Na opinion di Giovanni Atalita # 6 riba lista di KDNT STUDIANTENAN MESTER POR HAÑA TANTU KUMINDA MAINTA KOMO MERDIA NA SKOL

 

Na opinion di Giovanni Atalita # 6 riba lista di KDNT

STUDIANTENAN MESTER POR HAÑA TANTU KUMINDA MAINTA KOMO MERDIA NA SKOL

WILLEMSTAD – Enseñansa ta esensial den kresementu di un pais. Futuro di kada pais ta dependé kon su muchanan ta keda lanta i prepará pa despues nan ta esnan den e merkado di labor. No mester lubidá ku e muchanan di awe mayan lo ta nos gobernantenan.

Kòrsou pa hopi aña a bin ta konosé un modèl di enseñansa ku básikamente ta kopiá for di e sistema ulandes. Aki aya nos mes hendenan a hinka ingredientenan lokal aden, pero pre dominantemente nos struktura mester ta unu ku ta hopi serka di esun Ulandes, mirando ku hopi di nos muchanan ta bai sigui ku nan estudio na Ulanda.

Nos ku a studia aki na Kòrsou i na Estádos Unídos tin un ehèmpel di komparashon den dos sistema kompletamente diferente. Un di e kosnan ku mas a hala nos atenshon ta e struktura p.e. di skolnan na Merka ku tin un kafetaria, kaminda e mucha studiante ta kome su kuminda di mainta promé ku e bai den klas pa tuma lès i despues ta haña un kuminda kayente mèrdia pa despues nan sigui nan estudio parti mèrdia te banda di 3 or di atardi.

E struktura di pèrkurá pa tur skol na Kòrsou, for di preparatorio te ku avansá tin un kafetaria ta unu bon, pasombra ta proba ku un mucha ku stoma bashí no por konsentrá pa e por siña. 

Ta konosí ku den pasado Kòrsou a konosé voluntarionan ku ta prepará kuminda i hiba esaki skol, pero e pensamentu aki ta unu kaminda e mucha ta sinta den tur trankilidat i bon kordiná, kome tantu mainta komo mèrdia. Un pensamentu asina aki lo  duna su resultado, pasombra e úniko kos ku e mucha mester hasi ta studia.

Awor na Kòrsou nos tin vários Direktivanan di Skol. E desishon final mester ta na kada un dje direktivanan aki, pero alomenos  den e skolnan di Gobièrnu ku ta kai bou di DOS, lo ta  na su lugá pa studia algu asina aki i pèrkurá pa den e próksimo aña eskolar ku ta kuminsá na 2021 pa 2022 introdusí e Kafetaria aki den su  struktura. 

Di parti di Kòrsou di nos Tur, nos sigur ta dispuesto pa hasi análisis nan di esaki, mirando ku enseñansa ta esensial i vital pa ku  desaroyo di un pais. Nos muchanan na promé lugá. 

 

Atentamente

 

Giovanni Atalita