Pa evitá ku suidadanonan mester bai te Kranshi pa buska nan karchi KONSEHO ELEKTORAL MESTER HASI USO DI SENTRONAN DI BARIO PA REPARTI KARCHI VOTA KU NO A YEGA SERKA E PUEBLO

 

Pa evitá ku suidadanonan mester bai te Kranshi pa buska nan karchi

KONSEHO ELEKTORAL MESTER HASI USO DI SENTRONAN DI BARIO PA REPARTI KARCHI VOTA KU NO A YEGA SERKA E PUEBLO

 

WILLEMSTAD – Papiando ku suidadanonan riba votamentu di dia 19 di mart awor, nos a komprondé ku no ta tur hende a haña nan karchi di bai vota ainda. Skuchando medionan di komunikashon, nos por a tuma nota ku Konseho Elektoral ta pidi pa tur esnan ku no a haña nan karchi vota, pa pasa tur atardi entre 5 or pa 7 or pa buska esaki.

Papiando ku un votadó di Westpunt ku no a risibí su karchi di vota, el a indiká na nos ku  na promé lugá e no tin  transporte propio i ta dependé di  Transporte Públiko. E último bus ku ta bai Punda for di Westpunt ta Sali 5 or di atardi.  Pa e yega parada di Bus na Otrabanda pasando den tur e tráfiko ku ta bini pa riba, te pa e kana bai Kranshi den Kaya Grandi ya a bai basta ratu. Banda di esei ta bini aserka su baimentu bek Westpunt ku tambe ta bai tuma su tempu. Ta p’esei, mediante di esaki, nos kier a trese un solushon pa loke ta trata buskamentu di karchi di vota.

Lo ta bon Konseho Elektoral  selektá tur e hendenan ku p.e. ta biba di Tera Kòrá bai abou te Westpunt ku ainda no a haña nan karchi di vota, pa pasa buska esaki na Sentro di Bario na Barber. Di e forma aki e hende ku ta biba na Westpunt no mester bai muchu leu pa buska esaki. Ta mas ku klaro ku e suidadano mester presentá ku su  karchi di identifikashon bálido i bou di supervishon di sea hendenan di Kranshi i di Konseho Elektoral, ta entrega esakinan.

E mes un kos ta konta pa hendenan ku ta biba na Fuik i bisindario. Aki ta selektá tur hende ku  ta biba den e área aki i den Sentro di Bario na Montaña pa duna un ehèmpel, laga e hende bin buska nan karchi pa bai vota dia 19 awor.

Di e forma aki, ami komo kandidato nr. 6 riba lista di Kòrsou di Nos Tur, loke duna un aporte pa solushoná un dolor di kabes di hopi hende. Tur hende ku tin derecho di voto, mester por tin e posibilidat berdadero pa nan por ba vota. Esaki por sosodé solamente ora ku nan tin nan karchi di vota den man.

 

Atentamente

 

Giovanni Atalita

# 6 KDNT