VISHON: “Tur hende meresé un di dos chèns”
VISHON: “Tur hende meresé un di dos chèns”
Willemstad, 11 di Mart 2021 – ‘Solushon ta kuminsá na un bon edukashon’, i asina mi ke introdusí mi mes na kada un lesadó. Mi nòmber ta Steven “Pucho” La Nooy, mi tin 33 aña di edat. Mi mayornan ta di e dushi bario Boka Sami i mi mes a lanta den e bario di Brievengat. For di mucha chikí mi a lanta ku e pashon i ambishon pa un Kòrsou fuerte, próspero i pa krea oportunidat pa kada un habitante ku ta biba na Kòrsou. Ku eksperensia den e area sosial, un bon edukashon ku mi a risibí di mi mayornan i ku e konosementu i sabiduria di Dios Su Palabra, huntu ku Partido VISHON mi ke bai fokus i hasi lo máksimo pa e grupo ku tambe meresé un di dos chèns.
Ku mi 12 aña mi a bai Hulanda i desaroyá mi mes komo persona mas tantu posibel, pa regresá Kòrsou bèk na e momentu ku mi ta bon ekipá. I awor ta e momentu ku Dios a uní mi ku VISHON. Mi mes a laborá na Hulanda pa 6 aña den un funshon finansiero i despues a deskrubí ku mi ke ta mas serka di e HENDE. Ta p’esei mi a skohe pa sigui e estudio ‘Sociaal Maatschappelijk Dienstverlener’. Mi a haña e oportunidat pa laborá den e parti di resosialisashon i forma (èks-) detenidonan pa por haña un di dos chèns bèk den komunidat. Pa e hobennan i adultonan aki tambe lo yega e dia ku nan ta bai partisipá bèk den komunidat. Esaki mester bai di un forma edukativo i ku un plan fuerte pa evitá mas ku ta posibel pa nan bolbe kometé un akto kastigabel.
E punto ku mas lo sòru pa eliminá kriminalidat i laga kada un sinti ku nan ta kontribuí i forma parti di e komunidat, ta pa tur hende tin un partisipashon aun mas na Kòrsou. Mi ta di opinion ku trahadó sosial mester hunga un rol mas profundo serka e personanan aki, pa via di un trayekto intensivo i edukativo forma i duna nan bèk e disiplina ku norma i balor. Mi ta sigur tambe ku hopi hoben i adulto ku awor aki ta sintando un kastigu ta pa e falta di mal maneho ku gobièrnunan tin ta hiba sin un salida pa kasnan di famia. Esaki ta trese ku’né, ku pa falta di trabou, entrada of oportunidatnan a hiba e personanan aki na un otro solushon ku no ta e solushon korekto pa tog nan por a mantené nan famia. Pa duna e grupo aki i e futuro hobennan e solushon real, partido VISHON a traha riba un plan fuerte ku por duna nan un mihó perspektiva.
Mester bai forma i disipliná e hobennan i adultonan abase di kursonan dediká riba kon pa funshoná komo homber i muhenan balente i independiente. Por ehèmpel kon pa traha CV, buska trabou, regla nan budget di sèn i kon pa respetá i balorá otro. Mester enfoká hopi riba kursonan ku lo bai yuda nan ku un fishi ora nan drenta bèk den komunidat. Tin hopi trabou ku por wòrdu ehersé kaba pa detenidonan ku ahinda ta den prizon, pero ku ya kaba por yuda prepará nan na e momentu di regresá bèk den komunidat. Trabounan manera; kòki, arte kultural, argikultura, peska, konstrukshon, mantenshon, produkshon i mekániko. I pa ta sigur ku nan por bai kontribuí i partisipá bèk den komunidat, mester kuminsá enfoká riba e parti mental, huntu ku trahadó sosial ku por sòru pa e detenidonan por drenta bek den sosiedat i lo ta un ehèmpel pa nos hobennan aki ‘fó ku ta e futuro di mañan.
“Tur hende meresé un di dos chèns. Inverti den eduká, forma i guia nos (èks-)detenidonan ku e fundeshi ku ta konstití di disiplina, norma i balor lo hasi nan sigur i forma nan den un ambiente positivo ku siguransha ku nan tambe tin balor i un futuro riba nos dushi Kòrsou”, asina Steven “Pucho” La Nooy, kandidato riba lista di VISHON ta opiná.