Minister Jesus- Leito ta tuma nota di aparato nobo ku Ministerio GMN a atkerí pa monitòr supstanshanan kímiko den airu
Minister Jesus- Leito ta tuma nota di aparato nobo ku Ministerio GMN a atkerí pa monitòr supstanshanan kímiko den airu
Willemstad – Maneho di Medio Ambiente i Naturalesa resientemente a atkerí un aparato nobo ku por detektá i monitòr supstansianan tóksiko, gasnan inflamabel, hidrokarburonan volatil i radiashon. Ta trata aki di e AreaRAE Pro ku ta disponé tambe di e posibilidat pa monitòr riba distansia inkluso faktornan meteorológiko ku por afektá e velosidat, direkshon i komportashon di gas den airu. Esaki ku e meta pa primeramente detektá gas kímiko pa despues monitòr su konsentrashon riba nivelnan di tóksisidat pa eventualmente saka alerta di evakuashon.
E AreaRAE Pro aki ta monitòr diferente sorto di gas, entre otro:
▪ SO2, Dioxido di Asufre. Un gas ku ta keda produsí durante proseso di refinashon.
▪ NH3, Amoniak. Gas ku ta keda produsí den sektor di krio di bestia intensivo.
▪ CO, Monóxido di Karbono. Gas sin koló òf holó ku ta letal pa hende i bestia.
▪ H2S, Sulfuro di Hidrógeno. Gas ku holó di webu putrí ku por keda emití durante
proseso di refinashon.
Minister Jesus- Leito personalmente a tuma nota di e aparato i a risibí splikashon di Direktor di Sektor señor Gabriel Murray i señor Edgarick Jansen ámbos di Sektor di Medio Ambiente i Naturalesa.