Presidente di JCI Dutch Caribbean ku bishita na Prome Minister di Kòrsou

Presidente di JCI Dutch Caribbean ku bishita na Prome Minister di Kòrsou

 

Willemstad – Presidente aktual di e organisashon di JCI Dutch Caribbean, señora Sheryl Renfrum Sordam, a hasi un bishita na Prome Minister di Kòrsou i alabes senador di JCI señor Eugène Rhuggenaath. E bishita aki ta unu klave pa asina forma un aliansa ku Gobiernu di Kòrsou. 

 

JCI Dutch Caribbean ta un organisashon nashonal ku ta afiliá na Junior Chamber International (JCI). JCI ta e federashon mundial di lídernan entre 18 pa 40 aña ku ta dediká na trese kambio positibo den nos komunidat.  JCI Dutch Caribbean aktualmente ta konsistí di 5 kapitulo lokal repartí riba e isla nan Aruba, Kòrsou i Sint Maarten. Total e organisashon ta konsistí di mas di 110 miembro aktivo repartí entre e kapitulo nan JCI Willemstad, JCI IOBA Curaçao, JCI Creative Leaders in Curaçao,  (na Kòrsou), JCI Young Active Leaders of Aruba (na Aruba) i JCI SXM A.C.T.I.O.N (na Sint Maarten). 

 

Durante di e enkuentro ku Minister Presidente, señora Sheryl Renfrum Sordam a elaborá riba e proyektonan di e kapítulonan na Kòrsou ku ta relata na e meta nan duradero stipula pa Estados Unidos Sustainable Development Goals; “SDG’s”, spesialmente e 6 SDG’s nan mas importante pa Kòrsou di akuerdo ku Kalènder 2030 di Kòrsou. Por ehèmpel JCI CLIC ta enfoká riba Salú I Bienestar ku e proyekto ‘No Shave Novèmber’ pa krea konsientisashon riba kanser na prostat, JCI Willemstad tin e proyekto ‘Adopt A School’ kual ta enfoká riba Kalidat di enseñansa i JCI IOBA Curaçao ku ta konsentrá mas riba area di negoshi tin e proyekto ‘Digital Nomad’ ku ta duna posibilidat na ekstranheronan pa usa Kòrsou komo nan espasio di trabou, kual alabes ta stimulá kresementu di nos ekonomía. 

 

Señora Sheryl Renfrum Sordam tambe a duna un splikashon riba e inisiativa di “JCI RISE”. 

E inisiativa di “JCI RISE” ta e organisashon su reakshon pa ku COVID-19, inspirá pa e akshonnan di miembronan rònt mundu. 

“JCI RISE” ta enfoká riba sostenementu i rekonstrukshon di ekonomía, empoderashon di forsa laboral i preservashon di salú mental. E la sigui elaborá ku un dje programanan relatá na JCI RISE ta e programa ‘Creative Young Entrepreneur’, ku ta duna oportunidat na hobennan pa presentá nan idea di negoshi na posibel invershonistanan na JCI su Area Conference. 

 

Papiando di Area Conference, na 2022 lo bai tin e America Area Conference aki na Kòrsou. E Presidente di JCI Dutch Caribbean ta spera ku pa aña 2022 tur kos lo normalisá i ta spera aproksimadamente 400-500 hóben entre 18-40 aña di rònt mundu pa bishitá nos isla Kòrsou, kual lo yuda krese nos ekonomía. 

 

Presidente di JCI Dutch Caribbean Sheryl Renfrum Sordam ta spera ku Gobiernu di Kòrsou por traha huntu ku e organisahon i bira un partner ofishal pa asina huntu logra e meta nan di e Kalèndar 2030 di Kòrsou i tambe kolaborá ku America Area Conference pa 2022. 

 

Pa mas infòrmashon tokante di e trabou nan di e diferente kapítulo nan i e trabou ku e siudadano nan aktibo ta hasi den nos komunidat, bishitá e página di Facebook di kada un di e organisashon nan menshoná.

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: