Meteorological Department Curacao 𝗞𝗢𝗠𝗜𝗧𝗘́ 𝗗𝗜 𝗢𝗥𝗞𝗔𝗡 𝗔 𝗥𝗘𝗨𝗡𝗜́

 

Meteorological Department Curacao

𝗞𝗢𝗠𝗜𝗧𝗘́ 𝗗𝗜 𝗢𝗥𝗞𝗔𝗡 𝗔 𝗥𝗘𝗨𝗡𝗜́

E Komité di Orkan di Organisashon Mundial di Meteorologia (OMM) a retirá e nòmbernan di orkan Dorian (2019), Laura, Eta i Iota (2020) for di e lista di nòmbernan pa siklon tropikal den region Atlántiko. A hasi esaki pa motibu ku e sistemanan aki a kousa hopi morto i destrukshon.

Den un seshon virtual entre di 15 i 17 di mart e Komité di Orkan, ku ta sirbi Nort Amérika, Sentro Amérika i Área di Karibe (WMO Regional Association IV), a yega na un akuerdo riba e kambionan den su konvenshon di nombramentu. E enkuentro a evaluá temporada di orkan 2020 ku a kibra rekòrt i a pasa den detayenan di preparashonnan pa temporada 2021. Esei a inkluí dunamentu di pronóstiko- i atvertensianan i tambe evaluashon di impakto pa peliger di bientu, laman haltu i inundashon. Miembronan di e Komité di Orkan ku ta bini di Servisionan Meteorológiko i Hidrológiko den nos region, inkluyendo Servisio Meteorológiko Kòrsou, a deliberá riba formashon di tormentanan ku nòmber promé ku temporada di orkan kuminsá ofisialmente riba 1 di yüni. Pero e komité a yega na un akuerdo ku lo no tin kambio den e fecha ofisial di komienso di temporada di orkan 2021 pa region Atlántiko. A disidí tambe ku den futuro lo no usa e álfabèt griego mas, ya ku esei ta kita atenshon for di e komunikashon di mensahenan di atvertensia pa peliger i tormenta i posiblemente ta krea konfushon.

Temporada di orkan 2020 tabatin un komienso trempan i rápido ku un kantidat rekòrt di nuebe tormenta ku nòmber entre di mei i yüli. El a terminá lat ku dos orkan fuerte den novèmber, pa promé biaha den historia konosí, durante di un periodo kaminda normalmente temporada ta finalisando. E temporada tabata asina aktivo ku a usa tur nòmber den OMM su lista di 21 nòmber i mester a usa álfabèt griego pa solamente di dos biaha den historia (promé biaha tabata na 2005).

“Trabou di e Komité di Orkan di RA IV ta esensial pa tene nos nashonnan koordiná hopi tempu promé ku e siguiente tormenta menasá,” asina Ken Graham, Presidente di e Komité di Orkan i tambe Direktor di Sentro Nashonal di Orkan a bisa. “Orkannan no tin kunes ku fronteranan internashonal. Nos tur ta enfrentá peligernan similar di sistemanan tropikal. Impakto di un solo tormenta por afektá vários pais, di manera ku ta hopi importante pa nos tin un plan, koordiná nos esfuersonan i kompartí retonan i mihó práktikanan.”

Ounke e konvenshon di nombramentu ta djis un parti chikitu di e trabou di salba bida di e Komité di Orkan, e ta atraé mayoria atenshon di parti di públiko. E lista di nòmbernan pa siklonnan tropikal ta ripití kada seis aña, a ménos ku un tormenta ta asina mortal òf kostoso ku ta retirá su nòmber for di listanan den futuro.

Na tur 93 nòmber te awor a ser retirá for di e lista pa region Atlántiko for di 1953, tempu ku a kuminsá duna tormentanan nòmber bou di e sistema aktual.
E Komité di Orkan a akordá pa retirá nòmbernan di 2020 i tambe di 2019, ya ku esaki no tabata riba agènda di e seshon di Komité di Orkan di aña pasá, pa motibu di e krísis di COVID-19 ku tabata empeorando.

𝟮𝟬𝟭𝟵 – 𝗗𝗼𝗿𝗶𝗮𝗻
Dorian tabata un orkan di kategoria 5 (riba Eskala di Bientu di Saffir-Simpson) i e orkan mas fuerte ku a afektá parti nortwèst di Bahamas den historia moderno. Dorian a kousa daño katastrófiko na espesialmente Abaco i parti oriental di Islanan Grand Bahama ku un daño material total estimá na US$3.4 mil mion. Mas ku 75% di tur kas riba e islanan a sufri daño. Inter-American Development Bank (IDB), un agensia ku gobièrnu di Bahamas a pidi pa hasi un estudio despues di e racha di destrukshon di Dorian, a deklará ku e orkan a laga 29.500 hende sin kas ni trabou.
Dexter lo reemplasá Dorian riba e lista di nòmber pa 2025.

𝟮𝟬𝟮𝟬 – 𝗟𝗮𝘂𝗿𝗮
Laura tabata un orkan fuerte di kategoria 4 ku a yega kosta den bisindario di Cameron, estado Louisiana na Merka, kompañá pa un subimentu di nivel di laman di por lo ménos sinku meter riba nivel di suela. E tabata responsabel pa 47 morto dirèkt na Merka i Hispaniola i a kousa daño material na balor di mas ku US$19 mil mion.
Leah lo reemplasá Laura riba e lista di nòmber pa 2026.

𝟮𝟬𝟮𝟬 – 𝗘𝘁𝗮 & 𝗜𝗼𝘁𝗮
Orkannan Eta i Iota ámbos a yega kosta denter di dos siman durante di novèmber 2020 den e mesun region na kosta di Nicaragua, djis sùit di Puerto Cabezas. E dos siklonnan tropikal fuerte aki a kousa inundashonnan ekstenso na Nicaragua, Honduras i otro paisnan Sentro Amerikano ei banda. Esei a resultá den por lo ménos 272 víktima mortal i mas ku US$ 9 mil mion na daño material.

𝗔́𝗹𝗳𝗮𝗯𝗲̀𝘁 𝗚𝗿𝗶𝗲𝗴𝗼
Na dos okashon durante di último 15 aña a usa tur nòmber ku tin den e lista di nòmber i ta probabel ku esei lo sosodé atrobe den futuro. Miembronan di e Komité di Orkan a bai di akuerdo pa krea un lista suplementario di nòmber for di A te Z (ekskluyendo Q, U i tambe X, Y i Z riba e lista pa Atlántiko) ku por ser usá na lugá di e lèternan griego, den kaso ku a usa tur nòmber den e lista standart durante di sierto temporada. Nòmbernan riba e lista aki por ser retirá i reemplasá, na momentu ku esei ta nesesario. Nòmbernan ku ta kuminsá ku Q, U,
X, Y i Z ketu bai no ta sufisiente komun òf fásilmente komprendé den idiomanan lokal pa ser inkluí den e listanan aki.
Temporada 2020 a mustra ku tabatin un kantidat di fayo ku uso di álfabèt griego.

• Por tin muchu enfoke riba uso di nòmber di e álfabèt griego i no riba e impakto di e tormenta mes. Esei por kita hopi atenshon for di e mensahe riba impakto i seguridat ku ta asina nesesario.
• Ta eksistí sierto konfushon ku algun nòmber di álfabèt griego, ora ku esakinan ser tradusí na otro lenga den nos Region.
• Pronunsiashon di vários di e lèternan griego (Zeta, Eta, Theta) ta meskos i ta sosodé tras di otro. Na 2020, esei a resultá den tormentanan ku nòmbernan ku ta zona hopi meskos na mes momentu, loke a resultá den algun reto den mandamentu di mensahenan, en bes di un komunikashon suave i bon komprendibel.
• Impakto di Eta i Iota tabata sufisiente severo pa Komité di Orkan retirá e nòmbernan ei ofisialmente. No tabatin un plan ofisial pa retirá nòmber griego i uso di nobo den futuro di e nòmbernan aki lo tabata un akto no apropiá.

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: