Pregunta na gezag enkuantu selebrashondi Bevrijdingsdag
Na Sr. Gezaghèber E. Rijna
Parke Wilhelmina #1
Kralendijk
Bonaire C.N
Apresiabel Sr. Gezaghèber,
Frakshon Coffie a keda aserká pa un desishon di parti di Sr. Gezaghèber kende a duna pèrmit pa tene un evenemento di konmemorashon riba 5 di mei 2021 di e asina yamá “bevrijdingsdag”.
Manera ta konosí durante di dos guera mundial e úniko parti di Reino Hulandes ku no tabata okupá pa e alemannan ta e seis islanan den Caribe, entre kua Boneiru. Komo tal nunka a selebrá dia di liberashon aki riba nos islanan. Sí nos ta rekordá anualmente 4 di mei tur e bonerianonan ku a pèrdè nan bida durante segundo guera mundial pa liberá Hulanda: “Dag der gevallenen” Ései ta e historia skirbí.
Ta un echo ku dia 21 di aprel último Sr. Gezaghèber a anunsiá ku a deskalá e medidanan relashoná ku Covid-19 na skal 4. A anunsiá ku lo no pèrmití pa tene ningun evenemento, manera selebrashon di Dia di Rey (27 di aprel), Dia di Rincon (30 di aprel) i Dia di Labor(1 di mei).
Pa tal rason, hasiendo uso di artíkulo 45 di nos Reglamentu di Òrdu i ku petishon pa kontestá esakinan oral den nos próksimo reunion di Konseho Insular, mi ta hasi e siguiente preguntanan na Sr. Gezaghèber:
- Sr. Gezaghebber por informá Konseho Insular enkuanto e pèrmit ku a duna na un organisashon pa tene un evenemento relashoná ku konmemorashon di Dia di Liberashon (Bevrijdingsdag) riba e fecha 5 di mei 2021 den Sentro di Bario Tera Cora?
- E pèrmit aki a bai den konsulta i aprobashon ku direktorado di Komunidat i Kuido ku ta enkargá ku sentronan di bario, entre kua esun di Tera Cora?
- Kiko a kondusí ku a hasi eksepshon pa e organisashon organisá e evenemento riba 5 di mei?
- Nos tin informashon ku a nenga esnan enkargá ku sentro di bario Tera Cora pa tene evenementonan pa nos grandinan i otro evenementonan den e sentro. Sr. Gezaghèber por informá Konseho Insular e motibunan pa kiko a ninga tal petishonnan?
- Sr. Gezaghèber por splika na Konseho Insular ku e desishon pa duna pèrmit pa e konmemorashon di Dia di Liberashon no ta krea e aparensia ku ta apliká “willekeur” den e maneho?
- A yega serka nos e informashon ku e plataforma di Tera Cora a tuma retiro “en bloc” komo protesta pa e desishon aki. Kiko Sr. Gezaghebber ta opiná di esaki i kiko lo bai hasi al respekto?
En espera di reakshon di parti di gezaghèber, mi ta terminá.
Atentamente,
___________________________
Désirée E. Coffie
Miembro di Konseho Insular Boneiru