AQUALECTRA TEI KADUKÁ METERNAN KU NO TA DEN USO PA PREPARÁ PA INOVASHON

 

AQUALECTRA TEI KADUKÁ METERNAN KU NO TA DEN USO PA PREPARÁ PA INOVASHON

Willemstad 16 di Mei 2021- Aqualectra ta dal un siguiente paso pa redusí su gastunan operashonal i tambe kuminsa prepará pa introdukshon masal di su meternan inteligente i di futuro.  P’esei klientenen ku tin un konekshon di meter di awa of koriente, ku pa e último 12 lunanan no tabata tin konsumo riba dje, tin te dia 30 di yüni  próksimo pa indika na Aqualectra ku nan ta desea di mantene e konekshon aktivo.  Aqualectra lo hasi su maksimo esfuerso pa notifiká e klientenan ku tin meter di awa òf koriente ku no tin konsumo pa último 12 lunanan, atrabes di un karta ku Aqualectra lo manda pa nan den e próksimo dianan.  Ta pidi tur e klientenan ku lo ta deseá pa keda ku e meter y konekshon tòg, pa indiká esaki na Aqualectra pa medio di nos sentro di kliente 0800-0135.  Den kaso ku no tin reakshon pa fin di yüni, Aqualectra lo tuma e pasonan nesesario pa  pa retira e meter i kita e konekshon.  En total ta trata aki di 4.995 meter di awa, 2.426 meter di koriente Pagatinu i 749 meter di koriente konvenshonal.   Konekshon ku no ta den uso, ta representá inefisiensia i un peso finansiero pa Aqualectra i konsekuentemente pa nos tur.

Klientenan ku tin meternan di awa òf koriente ku nan no a usa pa 12 luna òf mas, tin 6 siman pa reakshoná. Por reakshoná dor di traha un sita via di e wèpsait (http://www.aqualectra.com) òf yama nos na 0800-0135 i primi opshon 3, i indiká ku bo ke traha un sita. Den kaso ku Aqualectra no risibí reakshon di parti di e kliente promé ku e fecha 30 di yüni, Aqualectra lo kita e meter i e konekshon fihá na esaki. Si e kliente ke habri un konekshon despues atrobe, lo e mester entregá un petishon nobo pa un konekshon.

Aqualectra ta spera di por haña reakshon di tur kliente ku risibí un karta òf ku tin un konekshon di awa i koriente ku no ta den uso.  Di e forma aki nos ta yega na un ret di distribushon di awa i koriente kaminda ta sigurá mas presishon i  informashon aun mas kla i korekto. Di e forma aki Aqualectra por dal e próksimo paso pa krea e ret di distribushon sabí, kla pa futuro instalando un meter inteligente pa abo tambe.

This site uses Akismet to reduce spam. Learn how your comment data is processed.

%d bloggers like this: