Durante un enkuentro ameno, Ministerio di GMN a gradisí Zita Jesus- Leito pa e bon koperashon durante e 10 lunanan ku e tabata minister di Ministerio di Salú, Medio Ambiente i Naturalesa. 

Durante un enkuentro ameno,

Ministerio di GMN a gradisí Zita Jesus- Leito pa e bon koperashon durante e 10 lunanan ku e tabata minister di Ministerio di Salú, Medio Ambiente i Naturalesa. 

 

Willemstad – Resientemente Ministerio di Salú, Medio Ambiente i Naturalesa (GMN) a organisá un enkuentro ameno kaminda tim di maneho i algun empleado a tuma despedida di señora Zita Jesus- Leito komo minister di GMN i a gradisi’é pa e bon koperashon. Minister Zita Jesus- Leito a hasi su trabou ku hopi dedikashon, ku logronan importante pa e ministerio i komunidat. E aspekto di duna bon servisio na komunidat ta faktor esensial den maneho di Minister Zita Jesus- Leito.

Sekretario General (SG) di Ministerio di GMN, señor Sharlon Melfor, durante su diskurso a mustra riba e dedikashon ku Minister Zita Jesus-Leito a traha pa Ministerio di GMN, apesar di tabata minister tambe pa otro ministerio grandi kual ta Ministerio di VVRP. Señor Sharlon Melfor a sigui splika ku señora Zita Jesus- Leito ta un persona ku por komuniká di un forma agradabel i ta habrí pa duna i risibí konseho. Esaki a pone ku empleadonan di ministerio tabata sinti nan mes na kas i konsekuentemente SG, na nòmber di personal di GMN, a gradisí señora Zita Jesus- Leito pa tur lokual ku e la hasi.

Minister Zita Jesus- Leito durante su diskurso a gradisí personal di GMN pe bunita gesto, pero tambe a menshoná diferente aspekto riba kua e ministerio mester pone mas atenshon na dje. Un di e puntonan esensial ta komunikashon i duna mas informashon na komunidat. Banda di esei señora a mustra ku mester buska solushon pa sierto situashonnan ambiental i drecha servisio na komunidat. Finalmente señora Jesus-Leito a mustra di a traha ku hopi plaser na Ministerio di GMN i ku for di Parlamento lo e keda ku atenshon pa e ministerio.

Riba potrèt por mira momentu ku SG señor Sharlon Melfor, na nòmber di personal di GMN, ta hasi entrega di un opsekio na Minister Zita Jesus-Leito.

Riba potrèt por mira SG señor Sharlon Melfor i Direktor di Sektor señor Gabriel Murray huntu ku Minister Zita Jesus- Leito despues di e parti ofisial.