Kon ku bai bin, CliniClowns ta sigui ‘ful swing’

 

Kon ku bai bin, CliniClowns ta sigui ‘ful swing’

 

Djasabra pasá, finalmente e torneo di gòlf karitativo pa CliniClowns 2021 a tuma lugá, despues ku anteriormente a pospon’é pa motibu di e lockdown. Mas ku 80 partisipante entusiasmá a hunga den tim di dos pa e bon kousa aki. Tur hende na harimentu ora ku e payasonan a hasi nan máksimo esfuerso pa dal e balanan di gòlf ku tur tipo di atributo di deporte menos gòlfklùp. Un kantidat di spònser generoso a opsekiá bunita premio pa e timnan ganadó. Banda di varios otro premio, tambe ta’tin unu di CliniClowns mes pa esun ku a dal e bala ‘closest to the nose’ (mas serka di e nanishi). Na final, e payasonan mes a yuda entregá e premionan, lokual a sòru pa un klousura ku ainda mas harimentu i alegria. “Nos ta mashá kontentu ku e entusiasmo i sosten di e komunidat di gòlf na Kòrsou i e apoyo enorme ku nos a risibí di Curaçao Golf & Squash Club den organisashon di e torneo. E tabata otro éksito rotundo i un gran gesto di parti di e komunidat di gòlf”, asina CliniClowns a laga sa. 

 

E fundashon a indiká ku lo usa e fondonan rekoudá pa kontinuashon di e trabou importante i mas entrenamentu kontinuo di e payasonan.

 

Fundashon CliniClowns Kòrsou pa kasi 13 aña kaba ta sòru pa divershon i alegria pa mucha malu, mucha ku un limitashon i hende ku demensia. E payasonan profeshonal i bon entrená di CliniClowns ta bishitá e varios institushonnan kompletamente grátis. E fundashon ta dependé kompletamente di e aporte di komunidat di Kòrsou, entre otro pa medio di e tipo di eventonan karitativo aki, donashon (mensual) i sosionan korporativo.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: