Calmes: “Trabou Pa Kòrsou TPK ta bishitá Curoil N.V.”

 

Trabou Pa Kòrsou TPK ta bishitá Curoil N.V.

Un pueblo bon informá no por wòrdu manipulá.

 

Luna pasá parlamentario pa Trabou Pa Kòrsou TPK, sr. Rennox Calmes, a hasi un bishita na Curoil N.V. E meta di e bishita aki tabata pa interkambiá i obtené informashon riba tereno di krudo i gasolin, teniendo na kuenta e status aktual di refeneria Isla.

 

Kontrali na opinion popular, Curoil N.V. ta hopi aktivo pa lokual ta desaroyonan positivo i nesesario. Algún ehèmpel ta e parti di salvaguardiá suministro si gasolin i gas pa kushiná duradero i na preis kuminiente. Tambe nan ta keda traha riba e parti di efisiensha, no opstante e echo ku aktualmente nos no tin un refeneria, ku tur konsekuensha ku esaki por trese ku n’e (entre otro gasolin karu).

Tambe Curoil N.V. a indiká ku nan ta dispuesto pa uni forsa ku “green entrepreneurs” pa asina por yuda baha gastu di energia na hotèlnan i otronan. 

Pa lokual ta pais Kòrsou den su totalidat, Curoil N.V. ta opiná ku ta hopi importante pa gobièrnu di Kòrsou stimulá sinergia entre e diferente NV-nan ku ta operá riba áreanan similar, pa asina por yuda baha gastu pa komunidat den su totalidat. Tambe Curoil N.V. a indiká ku e “Landsverordening pa ku suministro di gasolin i energia duradero” ta hopi importante den kuadro di esaki.

Trabou Pa Kòrsou TPK ta keda vigilá desaroyonan di Curoil N.V. di aserka.