Privasidat di tur suidadano yu di Kòrsou mester permanesé protehá i respetá
Privasidat di tur suidadano yu di Kòrsou mester permanesé protehá i respetá
Un gobernante orgániko no ta permití pa manipulá un pueblo
Minister i parlamentarionan tambe ta siudadano di Kòrsou i e leinan di privasidat ta konta pa nan tambe. Despues di atentado kontra di privasidat di e minister, nan ta bai sigui ku nan atentado kontra di privasidat di e pueblo. Pueblo habri bo wowo. Ta loke na promé instante nan kier a logra ku e lei di emergensia. No lubidá ku ta preshon di pueblo a stroba nan.
Trabou Pa Kòrsou TPK a bin ta tuma nota di atakenan kontra di privasidat di minister di Salubridat Medio Ambiente i Naturalesa (GMN). E atakenan aki no ta kontra di e minister, pero ta atakenan direkto kontra di nos leinan i privasidat i ta manipulando e situashon rondó di e minister i e echo ku pueblo no konosé su leinan pa imponé kosnan robes. Pero e gobernantenan orgániko di Trabou Pa Kòrsou TPK tei pa sali na defensa di pueblo.
Sigun Calmes: “komo parlamentario mi trabou ta di kontrolá gobièrnu, pues e minister, pero ora e minister su derechi ta wòrdu trapá, tambe ta mi trabou komo parlamentario pa sali i para esaki kontra di dje i kontra kualke suidadano”.
Pues asta ora nan no ta na mando mas i pueblo a rechasá nan maneho pa medio di elekshonnan liber i demokrátiko, nan ta purba kousa desòrdu. Polítika barata i antikuá ya no ta kuadra den e tempu aki mas. Tur esakinan ta demostrá balotamentu di pueblo su inteligensia, falta di liderazgo i falta di vishon.
Na lugá di pidi reunion riba privasidat di un minister ku a kaba di pasa “screening” ku éksito, pidi reunion i presentá plan kon pa Kòrsou desaroyá, kon pa transformá nos ekonomia, transformá finansas públiko i transformá enseñansa pe akoplá na sektor laboral i asina subi nos produkshon pa pais krese. Dikon nos no ta tende nan reakshoná kontra di e abuzunan laboral relashoná ku diskriminashon na trabou kontra di esnan ku no a bakuná?
Ta basta ku polítika barata i bou di nivel. Tur e supuesto profeshonalnan ku título MBA, abogado i èks direktornan etc. Niun no a presentá un plan pa Kòrsou, pero a baha na rudia pa un lei di konsenso COHO. Pero awe ta nan ta esnan ku boka di mas grandi kontra di derechi sagrado di un minister.
Ku e akto aki, awor pueblo sa sigur ken nan ta. Trabou Pa Kòrsou TPK ta keda hasi e trabou di un gobernante organiko. Un gobernante orgániko no ta permití ku ta manipulá un pueblo. Dilanti Kòrsou mester bai. Kresementu Kòrsou kier mira.