RDK TA PREPARÁ PA TRASPASO PROMÉ KU 30 DI SÈPTÈMBER

 

RDK TA PREPARÁ PA TRASPASO PROMÉ KU 30 DI SÈPTÈMBER

Willemstad 21 di Yüli 2021- Curaçao Refinery Utilities (CRU) resientemente a ofresé su empleadonan ku ta den servisio fiho e posibilidat pa firma un kontrakt ku ta indiká ku nan lo bai di akuerdo ku terminashon di nan empleo na CRU pa 30 di Sèptèmber próksimo.  Segun e planifikashon original ku RdK a kumbiní den e akuerdonan firmá den luna di Mei último, traspaso di e refineria i terminal pa CORC lo mester tuma lugá bou di algun kondishon. Te ainda CORC no a kumpli ku e kondishonnan aki. CORC por ehèmpel mester proba ku e tin fondo pa start e refineria i asina tin mas kondishon pendiente ku mester kumpli kuné.  

En bista di e desaroyonan aki, CRU mester kuminsá mobilisá pa tambe baha gastunan di personal.  

Den kaso ku ripará ku no ta logra yega na e punto kaminda CORC por tuma e fasilidatnan over, Refineria di Kòrsou (RdK), tumando na kuenta e guia ku gobièrnu duna, lo tin ku sigui asumí su responsabilidat pa buska un otro operadó nobo. RdK tin e speransa i ta hasi tur su esfuerso pa tin un operadó nobo ku lo ofresé empleo na trahadonan promé ku 30 di Sèptèmber 2021. RdK ta keda hasi lo máksimo pa yega na e ideal ku semper e ta bringa p’é esta start e refineria i operá e terminal ku un partner stratégiko komo operadó i rebibá e industria petrolero na Kòrsou.

 

Esfuerso di CRU pa mantene operashon i kontené gastu

CRU bou di un akuerdo ku RdK, a keda operá e fasilidatnan petrolero komo terminal di almasenahe, manteniendo e rekursonan tan ten pa suministro di kombustibel pa Kòrsou i pa un posibel aranke di e refineria den futuro serkano. CRU a mantené empleadonan kapasitá den servisio pa por garantisá un “start-up” eksitoso na momentu ku esaki mester tuma lugá pero e situashon aktual ta kostoso i no por dura hopi largu. 

Den e añanan i lunanan ku a pasa a ripará ku, apesar di desaroyonan i retonan riba merkado di refinashon, nos fasilidatnan petrolero tin un potensial pa bolbe bira e pilá grandi di sosten den nos ekonomia. 

Den mesun rosea sinembargo, a ripará tambe ku no tur kos ta bai segun e planifikashon deseá. 

 

Pa sigui baha gastu aktual di operashon, den luna di Ougùstùs Curoil lo kuminsá importá gas den forma líkido komprimí. Pa esaki lo bini ku e fasilidat di ISO Container riba Geiten Eiland (“Goat Island”). Mientrastantu ta sigui ku plannan pa konstrukshon di e planta di gas permanente ku lo remplasá e ISO containernan despues di tempu.

 

Despues di 30 di Sèptèmber proksimo

Tur esaki sinembarago no ta kita ku despues di 30 di Sèptèmber 2021 CRU lo sera porta. E mutibu prinsipal pa esaki ta ku lei i reglanan korporativo aplikabel no ta permití pa sigui finansiá pèrdidanan grandi ku CRU ta sufri ya pa mas ku 18 luna, sin ku tin bista kla riba un transishon di e empleadonan pa un operadó nobo. Pues CRU mester stòp su aktividatnan dor ku CRU lo no tin entrada pa kubri su gastunan.

En bista di e desaroyonan aki, CRU a ofresé tur su empleadonan ku ta den servisio fiho e posibilidat pa firma un kontrakt pa indiká ku nan lo bai di akuerdo ku terminashon di nan empleo na CRU pa 30 di Sèptèmber próksimo. Esaki ta kompañá pa un insentiva di pago di 2 luna adishonal di salario. CRU lo mester kuminsá e trayekto di aplikashon pa retiro serka SOAW pa empleadonan ku no firma e akuerdo di terminashon.

 

Si pa fin di Sèptèmber 2021 no tin bista riba un posibel traspaso pa un operadó nobo, RdK lo asumí su responsabilidat di kustodio di e instalashonnan den un forma kompletamente re-organisá, mientras ta sigui buska un partner stratégiko pa nos industria petrolero. 

 

-FIN- 

 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: