𝗣𝗿𝗼𝗺𝗲 π— π—Άπ—»π—Άπ˜€π˜π—²π—Ώ π—˜π˜ƒπ—²π—Ήπ˜†π—» π—ͺπ—²π˜ƒπ—²π—Ώ-π—–π—Ώπ—Όπ—²π˜€: π—˜ π——π—œ 𝟳 π——π—œπ—” π——π—œ π—₯π—˜π—¨π—‘π—œπ—’π—‘ 𝗖𝗨 π—¦π—§π—”π—žπ—˜π—›π—’π—Ÿπ——π—˜π—₯𝗦 π—˜π—‘ π—–π—’π—‘π—˜π—«π—œπ—’π—‘ 𝗖𝗨 𝗙𝗒π—₯π— π—”π—–π—œπ—’π—‘ π——π—œ π—šπ—”π—•π—œπ—‘π—˜π—§π—˜ π—ͺπ—˜π—©π—˜π—₯-𝗖π—₯π—’π—˜π—¦ π—œπ—œ

𝗣𝗿𝗼𝗺𝗲 π— π—Άπ—»π—Άπ˜€π˜π—²π—Ώ π—˜π˜ƒπ—²π—Ήπ˜†π—» π—ͺπ—²π˜ƒπ—²π—Ώ-π—–π—Ώπ—Όπ—²π˜€:
π—˜ π——π—œ 𝟳 π——π—œπ—” π——π—œ π—₯π—˜π—¨π—‘π—œπ—’π—‘ 𝗖𝗨 π—¦π—§π—”π—žπ—˜π—›π—’π—Ÿπ——π—˜π—₯𝗦 π—˜π—‘ π—–π—’π—‘π—˜π—«π—œπ—’π—‘ 𝗖𝗨 𝗙𝗒π—₯π— π—”π—–π—œπ—’π—‘ π——π—œ π—šπ—”π—•π—œπ—‘π—˜π—§π—˜ π—ͺπ—˜π—©π—˜π—₯-𝗖π—₯π—’π—˜π—¦ π—œπ—œ
Prome Minister Evelyn Wever-Croes, despues di e reunionnan cu varios stakeholder dialuna mainta, a duna un declaracion amplio riba con e reunionnan a bay. Esnan cu a participa na e reunionnan tawata: Sandy van Tol, Arubaanse Vereniging van Belastingadviseurs; Andy Hernandez, San Nicolas Business Association; Ronella Croes, Aruba Tourism Authority; Daniel Ferara, Aruba Food and Beverage Association; Sr. Valdez, OPPA.
E Asociacion di Conseheronan di Impuesto a toca e tema di desaroyo economico, no solamente pa stimula e economia pero tambe pa un bon funcionamento di e departamento di impuesto. Especialmente sin atrasonan, sino un departamento cu ta traha den actualidad. Nan a comenta tambe riba e leynan cu mester bira mas senciyo, mas cla y pa nan tin siguridad adelanta con ta aplica cierto leynan. Esey nan ta kere lo yuda pa desaroya nos economia mas lihe.
Sanicolas Business Associatoin a entrega un manifiesto cu diferente punto cu nan lo kier pa Gabinete Wever-Croes cumpli cu nan den e prome 100 dianan di gobernacion. A repasa cada punto y mester bisa cu varios punto cu nan a trece padilanti ta importante pa crea desaroyo den San Nicolas. Desaroyo den area di industria pero tambe den area di turismo pa crea bienestar general pariba di brug.
Aruba Tourism Authority (ATA) a indica cu turismo ta recuperando. Berdad entradanan a cay hopi pisa aΓ±a pasa, tambe entradanan di ATA y aworaki ta den fase pa mira con ta recupera di e sla aki. Tin varios plan di accion den cual ATA tambe a duna su contribucion importante. Tanto ATA como Gobierno ta di acuerdo cu turismo ta e pilar economico cu lo saca nos di e pandemia. Sigur cu mester diversifica pero e turismo ta keda e driver di nos economia. Pa esaki mester un ATA fuerte pa enfrenta e retonan aki.
Aruba Food and Beverage Association, a elabora no solamente riba kico tur e diferente comercaintenan tin mester pa un desaroyo, sino a trece mas bien e temanan cu ta mas relevante den e area di Food and Beverage. Nan a comparti cu nan preocupacion cu nan no ta haΓ±ando hende pa traha. Esaki sigur pa Gobierno tambe ta un preocupacion mirando cu tin 3800 perosna riba FASE dus no tin trabou. Sea e hendenan aki no tin e rekisitonan cu ta wordo pidi, of sea tin un desmotivacion den nos hendenan pa drenta bek den e mercado laboral. E berdad ta cu Gobierno a bin cu FASE y nos ta duna pakete di cuminda y loonsubsidie pero esakinan ta temporal y poco poco lo yega na final pa asina haΓ±a hende bek den e mercado laboral.
Ta importante pa traha riba e motivacion pa trabou y Gobierno lo mester bin cu reglanan y pone como un di e exigencianan pa e ciudadano haΓ±a FASE e siguiente luna, e mester ta aplicando pa trabou y tuma loke tin etc.
OPA, e Organizacion di Pensionadonan di Aruba a presenta un documento bastante elabora pa unda nan a apunta e retonan cu adultonan mayor ta enfrenta. Nos pensionadonan ta esnan cu a constru nos economia cu nos y nos yiunan ta bibando aden. Nan ta tesoro pa henter nos sociedad y nan tambe mester por conta. A toca diferente tema, manera di salud y e temponan di espera, e prima di AZV cu ta hopi halto, e prijsnan cu ta hopi caro, tema di belasting etc entre otronan. A papia tambe riba e tema con pa duna nos adultonan mayor mas representacion pa aisna un gobierno tene cuenta structuralmente cu interesnan di nos adultonan mayor cu ta parti grandi di nos comunidad.
Durante e gobierno di Gabinete Wever-Croes I, a cuminsa cu Raad Voor Ouderen. Lamentablemente pa motibo di otro prioridadnan cu Covid y Lanspakket e finalisacion no a tuma luga ainda pero ta den fase final caminda mescos cu nos tin Sociaal Economische Raad, nos lo haΓ±a un raad voor ouderen cu lo duna conseho na gobierno riba tur e temanan aki cu tin di haber cu adulto mayor. Esaki lo pone cu nos adultonan mayor lo haΓ±a atencion constante y structural di tur gobierno.
Prome Minister a expresa su satisfaccion di con tur e reunionnan di dialuna a bay y a duna di conoce cu tur e puntonan y feedbacknan cu a wordo treci, lo wordo inclui den e acuerdo di gobernacion.

 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: