Parlamentario Steven Croes su mensahe pa aña eskolar 2021-2022:

Parlamentario Steven Croes su mensahe pa aña eskolar 2021-2022:
Awe ta e komienso di aña eskolar 2021-2022 i via di e komunikado aki mi kier a deseá na promé lugá tur dosente, kabes di skolnan i direktiva nan di skolnan i muy espesial nos muchanan un aña eskolar eksitoso.
E aña aki ta habri nos atrobe den e pandemia di Covid-19. Esaki ta trese diferente reto dilanti nos den e sektor aki. Mi ke duna mi palabra di sosten na nos aparato di enseñansa i tur personanan ku dirèkt òf indirekto ta forma parti di esaki.
Covid-19 manera nos tur a eksperensia delaster aña i mei a trese hopi reto den nos forma di enseñansa. No solamente riba e parti di higiena i distansia, pero tambe den nos pensamentu i nos manera di hasi.
Nos “mindset”; Komo dosente i alumno ta hopi importante pa tur dia nos keda motivá i no “give up” maske kon moeilijk esaki por ta.
Ta hopi importante ku nos tur duna di nos parti i asina garantisá un aña eksitoso. Kuida bo mes i otronan rondó dibo. Nos tur ta konektá ku otro di un òf otro manera i ta importante ku nos ta siña nos muchanan esaki for di chikí. Nos tur ta huntu den esaki i mester ta solidario ku otro.
No ta dosente i alumno mester duna di nan mes. Tambe nos komo mayor i edukador na kas. Nos mester kòrda ku “Bai skol” tur dia no ta manera ántes mas. E ròl ku nos ta hunga den edukashon di nos yunan tambe ta importante.
Mi ke vooral urgi kada un mayor i edukador pa dediká èkstra tempu na kas ku bo yu(nan) i nan edukashon. Sinta kuné ora di traha tarea, siñe kon e tambe por ta mas responsabel i yuda kombatí e pandemia aki den kura di skol. Papia kuné tokante su sintimentunan i mas importante keda motiv’é. Bise ku e reto di e aña eskolar aki tambe e por pasa dor di dje. Laga nos siña nan norma i balor i tambe siña nan disiplina pa ku nan tareanan di skol. Esaki ta un pensamentu ku ami ta yama “ Teach them young”, esta “Siña nan for di chikí”.
Rekreashon tambe ta un forma kon nos por keda motivá i enkurashá nos yunan. Un wega di bala den kura òf kana un rònchi den bario. Tur esakinan huntu lo sòru ku nos yunan ta sigui desaroyá i sali ahun mas fuerte den nan formashon.
Muchanan, dosentenan, direktiva, mayornan, pueblo di Kòrsou! Hopi éksito i laga nos tur ban p’e!