Site icon KIKO TA PASANDO NOTISIA I INFORMASHON

Tur siudadano por hasi petishon pa saneá debe di impuesto

Advertisements

 

Tur siudadano por hasi petishon pa saneá debe di impuesto

Geplaatst op 29 August 2021 dor di Ministerio Finansa

WILLEMSTAD – Nos pais ta pasando den un situashon finansiero i ekonómiko sumamente difísil. Pa tantu e siudadano komo gobièrnu no tin sufisiente plaka. Minister di Finansa su tarea ta di hiba un maneho finansiero sano ku ta enserá tambe kobra impuesto atrasá. Tur hende i tur instansia ku ta laborá i/òf sea hasi negoshi na Kòrsou, mester paga impuesto riba entrada i/òf ganashi. Tambe e tin e deber di kumpli ku pago di tur impuesto segun lei i maneho di pais.

Asina ta kontribuí pa pone sèn den kaha di gobièrnu. Gobièrnu ta usa e sèn pa enseñansa,  salubridat, drecha kaya i paga personal. Si un siudadano tin difikultat pa paga belasting e por bini na remarke pa drenta un areglo di pago na Ontvanger. Esaki no ta nada nobo. Tambe Minister di Finansa a krea e oportunidat pa haña kwijtschelding (saneá debe di impuesto).

Pa bin na remarke pa hasi uso di saneamentu di bo debe di belasting, por hasi lo siguiente:

  1. Mester manda un petishon na e e-mail adrès: sanering@gobiernu.cw òf por tuma kontakto na number di telefòn 734-2224;
  2. E persona ku ta bini na remarke pa haña e saneamentu lo risibí un formulario pa yena su dato ariba i mester firm’é i mand’é bèk na e e-mail adrès ya menshoná;
  3. Despues ku Ontvanger risibí e formulario bèk, lo e manda e akuerdo di saneamentu pa e persona firma. Aserka e persona mester hasi e pago akordá riba kuenta di Ontvanger;
  4. Ora Ontvanger risibí e formulario firmá bèk i komprobante di e pago hasí dor di e persona ku a hasi e petishon, e ora ei e akuerdo ta kompletá i lo no molostiá pa restante di e debe, teniendo kuenta ku kondishonnan di e saneamentu.

Pa haña e formulario pa hasi un petishon asina por bini na remarke pa saneá debe di impuesto, por fabor klek riba: www.minfin.cw/SANERINGSREGELING

Exit mobile version