Dia Mundial di Prevenshon di Suisidio 2021
Dia Mundial di Prevenshon di Suisidio 2021
Willemstad – Dia Mundial di Prevenshon di Suisidio anualmente ta tur 10 di sèptèmber i tin e meta pa krea konsientisashon riba prevenshon di suisidio rònt mundu. E tema di e aña aki ta: “Ban krea speransa atraves di akshon”. Mester di akshon konhunto riba tema tan delikado i urgente aki den konteksto di salú públiko. Nos tur, famianan, amigunan, kompañero di trabou, miembro di komunidat, edukadó, lidernan religioso, profeshonalnan di salú, funshonarionan di gobièrnu i Parlamentu por yuda prevení suisidio den nos komunidat.
Meta di e dia
E meta di e dia aki ta pa krea konsientisashon, promové e kolaborashon bou di e diferente “schakelnan” den e kadena i empoderá komunidat pa siña kon rekonosé intento i prevení suisidio. Pero tambe komo prensa responsabel dor di publiká mensahenan positivo i informativo enbes di praktiká periodismo sensashonalista. Pone atenshon speshal na e grupo di riesgo manera hubentut, fasilitando debate sano riba social media riba e tema di salú mental den diferente setting (na kas, na skol, na trabou etc.). Tambe ta enkurashá e persona ku a trata di kometé suisidio òf ku a keda afektá dor di suisidio pa nan kompartí nan historia i buska ayudo profeshonal.
Ban pa Speransa atraves di akshon
Suisidio i intento di suisidio tin un efekto di dominó ku ta afektá no solamente e persona pero tambe famia i komunidat. E faktornan di riesgo di suisidio manera pèrdida di trabou, pèrdida di kas, trauma òf abusu, trastorno mental i uso di supstansha pero tambe e barera pa yega na ayudo médiko a bira pio aktualmente pa motibu di Covid-19. Un aña despues di Covid-19, hopi hende ta indiká ku nan salú mental a bai atras.
Por prevení suisidio
E forma prinsipal pa prevení esaki ta; restringí akseso na medionan ku ta uza pa suisidio manera arma di kandela, pestisidanan venenoso etc., fortifiká maneho di salú mental, prevení mal uzo di alkohòl i droga i promové informashon responsabel via media tokante e tema. Prinsipal obstakulonan pa e buskeda di ayudo ta; falta di konsientisashon i stigma soshal. Esakinan ta suprayá e nesesidat di konsientisashon riba e tema di salú mental i kombatimentu di e stigma rondó di esaki. Pa mas informashon òf ayudo por tuma kontakto ku PSI Skuchami riba e numbernan di telefòn: Montaña 690 0593, Brievengat 690 3306, Otrobanda 690 0591 i Tera Còrá 690 0595.
