“Si koalishon no sa kiko hasi, sigui ku kanabis i agrikultura!” No mester buska toverstòk paso PIN a bai laga alternativanan konkreto.

 

 “Si koalishon no sa kiko hasi, sigui ku kanabis i agrikultura!”

No mester buska toverstòk paso PIN a bai laga alternativanan konkreto.

 

Willemstad — Despues di skucha sra. Gobernador, e ta mas kla ku di dia ku e koalishon MFK-PNP te ainda no por presenta un idea ekonómiko nobo ku ta konkreto i koherente. Un parti a bende su alma pa un COHO sin niun sèn aden. Un otro parti ainda ta papia di Plan B, siendo ku e diskurso di Gobièrnu tresé pa Gobernador, no a dediká niun sekònde na esaki. Partido PIN ta kere ku ta basta ku wega di palabra. Mester duna nos ekonomia atenshon awor.

Pa esei no mester wak leu: PIN a bai laga lei pa kanabis medisinal kla i a perkura pa un areglo di awa barata pa agrikultura. Si gobièrnu ta buska ‘mindshift’, e meste kuminsá ku loke nos mes por.

 

Babilonia

Despues di kampañá kontra COHO, awe e partido lider di koalishon ta praktiká ‘kiezersbedrog’ dje kalidat mas puru, aseptando COHO sin sikiera por bisa ki benefisio finansiero i ekonómiko direkto e lo trese. MFK su lider di frakshon sr. Thode ta deskartá diskushon riba COHO den parlamento awor aki bisando ku parlamento no por diskutí riba un lei ku no ta konosí. Pero for di su frakshon mes, sr. Doran ya a laga sa ku ora COHO yega serka dje, e lo vota kontra.

PIN ta puntra: akaso sr. Doran si a wak e lei? Si e no a wak e lei, ta a base di kiko e ta kontra foi awo? Sr. Thode su negativo pa awor aki papia den liña general riba COHO den parlamento ta konta pa tur hende ku eksepshon di sr. Doran? Sr. Doran ta parti dje frakshon blanku ainda òf ta hustamente pa skonde e diferensianan promé minister Pisas a evitá di bin parlamento?

Komo chèri riba e bolo di konfushon, komunidat ta tende ku no mester di COHO paso Plan B ta bon bon. Sinembargo e outornan i sostenedónan di Plan B no ke kompartí e plan ei ku komunidat. PIN ta puntra: e plan ei tei bèrdat? Pais no meresé pa sa kontenido di e plan ei? No ta un falta di rèspèt polítiko i elektoral pa laga desishonnan dependé di un plan aparentemente sekreto?

Pa Partido PIN tur esaki ta muestra di un gobernashon i koalishon sin kompas ekonómiko.

 

Alternativa

Gobièrnu Pisas sinembargo meste usa agrikultura komo un ruta ekonómiko alternativo konkreto ku e por sigui awor, tur esten e ta kaba di pensa unda e ke yega. Partido PIN a traha e lei pa fasilitá kanabis medisinal. E lei ta kla. Segun kálkulonan di ministerio di ekonomia, den ménos ku 7 luna por start e industria aki i den tiki aña e por generá kasi 9 mil trabou i mas ku 280 mion florin èkstra na entrada fiskal. Si akaso mes Kòrsou a pèrdè momentum, tòg lo ta un gran adelanto si nos realisá sikiera un kuart di loke MEO mes ta bisa.

Ademas, PIN a proba ku den tiki tempu agrikultura general tambe por krese enormemente. Pa sigui krese i yega e meta pa remplasá entre 100 i 150 mion florin na importashon di fruta, bèrdura i karni, PIN a pèrkurá pa un areglo pa agrikultornan haña awa hopi mas barata serka Aqualectra mes. Ta falta solamente un dekreto ministerial dje minister di ekonomia. Pregunta: kiko gabinete Pisas ta warda pa regla esei?

 

Gol sin kiper

Na lugá di sinta mira Gobièrnu Pisas warda mana di COHO kai foi shelu, Partido PIN ta kere ta mihó presidente di Parlamento i sobra representantenan di pueblo pidi i yama un reunion riba e alternativanan konkreto aki, ya asina komunidat por haña e lus na horizonte ku tantu e mester. Esei ta gol sin kiper sigur.

En todo kaso, den dianan ku ta bin PIN lo sigi mustra riba e importansia i potenshal ku agrikultura tin.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: