Industria i Turismo di Wellness por “boost” Kòrsou su ekonomia

 

Kòrsou Salú a selebrá World Wellness Weekend huntu ku 132 pais durante wikènt pasá, ku varios aktividat virtual i den naturalesa. 

Industria i Turismo di Wellness por “boost” Kòrsou su ekonomia

Den kuadro di e World Wellness Weekend dia 18 i 19 di Sèptèmber 2021 Kòrsou Salú a organisá un wikènt ku e tema “Sea inspirá, sinti bo bon”, kargá ku aktividatnan virtual i den naturalesa. Meta di e evento tabata pa inspirá kada persona pa hasi algu pa su mes i den famia ku ta reflehá varios aspekto di Wellness i lagabu mira kiko bo por hasi pa bo sintibu bon i kon bo por kontribuí na un desaroyo di wellness na Kòrsou. Oradónan a duna for di diferente angulo un bista di Kòrsou kòmo un pais di Wellness. 

Dokter Rob de Lannoy a splika ku e aspekto di mira bienestar no solamente komo bo estado di salú físiko ta ekistí hopi tempu i hasta ta bai bek te den tempu di Hippocrates i Galenius. E palabra wellness ta bin di un kombinashon di e palabranan Wellbeing i Fitness = Wellness i ta enserá un balanse entre estado di salú fisiko, mental, spiritual, intelektual, sosial i aspektonan okupashonal, finansiero, alimento i medio ambiente. Den e sentido ei wellness no ta nada nobo i no ta algu di Kòrsou so. 

Wellness ta un fuente di entrada importante pa paisnan rònt mundu ku ta “cater” na e hende ku ta buska e balanse ku ta lague sinti bon. Eks Minister di Salubridat, Medio Ambiente i Naturalesa Suzy Römer  a duna un bista di e maneho di Wellness ku ela traha i hiba huntu varios stakeholders. Ela ilustrá kon bo ta stimulá bo pueblo pa kome salú dor di planta su mes kuminda i stimulá agrikultura di un forma struktural i regenerativo. E eks mandatario a ilustra tambe kon grandi e industria ta i kuantu posibilidat tin si Kòrsou drenta den e niche di Turismo di Wellness. “Nos tin masha hopi di ofresé, masha hopi empresario ta aktivo den e sektor di Wellness Tourism i ta ofresé servisio i produktonan tantu na nos ku ta biba aki komo e bishitante”. “Nos naturalesa, influenshá pa nos laman, solo, flora i founa ta base pa bira un destinashon di wellness” e eks mandatario a duna di konosé. Karibe so, enkabesá pa Jamaica, ta bon pa mas di 300 bion na entrada generá pa medio di turismo di Wellness. 

Kòrsou Isla di kurashon!

Korsou pa tradishon ta un sitio kaminda hende tabata bin pa rekuperá debí na e naturalesa i kombinashon di solo, laman i flora i founa i tambe e grado haltu di vibrashon energétiko ku tin riba Kòrsou. Rudolf de Wit a spliká ku  tur tempu Kòrsou tabata un isla di Wellness. E nòmber di Kòrsou, originalmente Curação, 

 

ta nifiká kurashon. Historia ta mustra kon den pasado promé e spañonan i den tempu kolonial e personanan sklabisa despues di e traspaso di Afrika pa Karibe, tabata keda Kòrsou paso nan tabata malu i a resultá ku nan tabata rekuperá. 

Vortex

Olga Job, Wellness Coach internashonal a mustra ku Kòrsou ta situá net riba e ruta di frekuensianan di Vortex ku ta manda vibrashonan energétiko positivo riba Kòrsou. Na algun sitio na mundu manera na Peru, Sedona na Merka, Mexico, Egipto i Nepal tin konsentrashonan sumamente haltu di e energia di Vortex aki i Kòrsou ta nèt kaminda 3 di e frekuensianan aki ta kontra ku otro. Pa nos por benefisia di esaki i atrae bishitantenan ku ta bin pa hisa nan nivel di vibrashon i sinti nan mes bon, nos mester sòru pa e infrastruktura i e servisionan tei. Mas ku tur kos mester uni forsa pa por disfrutá di e benefisionan ku industria di Wellness ta trese pa nos. Nos mester tene Kòrsou limpi, nos hendenan mester mantené nan kurpa i mente sano dor di kome salú, hasi ehersisio i biba den harmonia ku naturalesa. Kòrsou tin tur kos pa bira un sitio rekonosé komo un sitio di Wellness. Korsou ta Bendishoná! 

Wellness ta pa bo tambe

Aspektonan di nutrishon, imunidat i e importansia pa algun bia pa aña bo detoxifiká bo kurpa pa elimin’a i evita malesanan manera e.o. kanser i Covid-19 a keda enfatisá. Carl Camelia a splika tokante meditashon transendental i kon e por ta bon pa bo i pa henter komunidat. Vanessa Gomes di Kuida Kurpa a duna un workshop tokante e balanse entre tur e aspektonan ku ta kondusí na bo salu i bienestar i kon pa bo kuida bo mes tanten bo ta kuida otro (mantelzorg) i atendé e impakto ku e tin riba esun ku ta responsabel pa kuida un otro. 

Djasabra atardi, durante di e programa Kòrsou Salú na Radio Krioyo, Gileon “Gilo” Garmers ku a sobrebibí Covid-19 a konta su “journey” for di momentu ku ela keda diagnostiká ku Covid-19 i a bira hopi hopi malu i kon poko poko ela rekuperá. Gilo a ilustrá ku dor ku e tabata kome salu i hasi ehersisio, apesar ku ela bira hopi malu e por a sobrebibi Covid-19. Despues di 6 siman den koma, Gilo aworaki ta hopi leu den su rekuperashon. Ku su testimonio e ke mustra hende ku un bida salú huntu ku bakunashon ta e manera pa kombatí e viro di Civod-19. 

Pa koroná e weekend Clifford de Lannoy a bai kana ku un grupo den e naturalesa bunita  di Mal Pais. E grupo tabatin un variedat di partisipante di edat di 7 pa 77 aña. 

Pa wak tur e videonan bek por bishita e Facebookpage di Korsou Salu @KORSOUSALU. Si bo ke forma parti di un of mas di e inisiativanan hasi kontakto via facebook whatsapp, messenger of via e-mail korsousalu@gmail.com.

 

Tokante Kòrsou Salú

Kòrsou Salú ta un movementu pa konsientisashon riba aspektonan ku ta influenshá nos salú i bienestar. Aplikando siensia, medisina integral i énfasis riba prevenshon nos lo logra un pueblo konsiente, salú, i felís. Na Mei 2021 a lansa e movementu aki pa medio di un konferensia virtual titulá Bo Tripa i Gluten un Enemigu Silensioso? I wikent ku a pasa tabata turno pa Wellness Weekend ku e titulo Sea Inspirá, Sintibu Bon!

Like e page riba Facebook: @KORSOUSALU pa sigui e desaroyonan!

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: