Gabinete Wever-Croes Minister di Husticia y Asuntonan Social, Rocco Tjon: π—₯π—˜π—¦π—¨π— π—˜π—‘ π——π—œ π—˜ 𝗣π—₯π—’π— π—˜ π——π—œπ—”π—‘π—”π—‘ π——π—œ 𝗧π—₯𝗔𝗕𝗒𝗨 π——π—œ π— π—œπ—‘π—œπ—¦π—§π—˜π—₯ π——π—œ π—›π—¨π—¦π—§π—œπ—–π—œπ—”

 

Gabinete Wever-Croes

Minister di Husticia y Asuntonan Social, Rocco Tjon:
π—₯π—˜π—¦π—¨π— π—˜π—‘ π——π—œ π—˜ 𝗣π—₯π—’π— π—˜ π——π—œπ—”π—‘π—”π—‘ π——π—œ 𝗧π—₯𝗔𝗕𝗒𝗨 π——π—œ π— π—œπ—‘π—œπ—¦π—§π—˜π—₯ π——π—œ π—›π—¨π—¦π—§π—œπ—–π—œπ—”

β€œTa spera di por tin bon cooperacion y conbersacionnan cu tur departamento den area di Husticia den e proximo 4 aΓ±anan”

Minister di Husticia y Asuntonan Social, Rocco Tjon a duna un resumen di e prome dianan di trabou indicando tambe e retonan den e dos areanan aki. Den e prome siman ya caba Minister Tjon a cuminsa sinta cu e sindicatonan cu tin representantenan den area di Husticia of Asuntonan Sociaal. Total tin mas o menos 60 departamento of fundacion cu ta cay bou di e carteranan aki y ta imporante pa scucha nan pa asina haΓ±a un bon conocemento di nan mes kico nan tin como prioridad.

β€œObviamente como Minister y como Gobierno nos tin nos vision loke nos kier logra e 4 aΓ±anan nos dilanti pero mi ta kere ta hopi importante tambe pa incorpora e ideanan di e trahadonan mes den e vision aki. P’esey un carta a wordo manda pa tur director, presidente y hefe di departamento pa despues entrega un β€˜startnotitie’ pa asina nos por tene cuenta cu tur nan puntonan den e β€˜beleidsvoornemen’ cu ta cuminsa den Presupuesto 2022 cu ta un ehercicio cu ta andando aworaki”, Minister Tjon a duna di conoce.

π—œπ—‘π——π—˜π—£π—˜π—‘π——π—œπ—¦π—” π—¦π—–π—’π—Ÿ π——π—œ π—£π—’π—Ÿπ—œπ—¦:
E titular di Husticia a duna di conoce cu tin diferente cambio importante cu su Ministerio lo kier trece padilanti. Lo instala diferente comision di trabou pa un decreto ministerial den e proximo dianan. Un di e comisionnan ta pa logra independisa e Scol di Polis. E Minister a remarca cu tur partner den Husticia ta haΓ±a esaki un bon idea pa motibo cu esaki ta baha gastonan pero lo ofrece un eneseΓ±ansa di calidad mas halto ainda pa ful e cadena di husticia pero tambe pa e sector publico den su totalidad. Esaki ta un ehercicio cu lo cuminsa y mestrer culmina den un academia di husticia.

𝗙𝗒𝗑𝗗𝗒 π——π—œ π—”π—¦π—œπ—¦π—§π—˜π—‘π—–π—œπ—” 𝗣𝗔 π—©π—œπ—–π—§π—œπ— π—” π——π—œ π——π—˜π—Ÿπ—œπ—§π—’π—‘π—”π—‘ π—₯π—˜π—Ÿπ—”π—–π—œπ—’π—‘π—” 𝗖𝗨 π—©π—œπ—’π—Ÿπ—˜π—‘π—–π—œπ—”
Den su maneho, Minister Tjon kier introduci pa otro aΓ±a caba un fondo pa duna asistencia na victimanan especialmente victima di delitonan relaciona cu violencia. Esaski ta un concepto cu ta conoci na Hulanda y na Boneiro. E Minister tin tur confiansa cu esaki ta un iniciativa sumamente bon pa victimanan di delitonan cu tin un aspecto di violencia incorpora den dje y ta un idea cu ta wordo carga tambe door di Procurador General.

π—π—¨π—¦π—§π—œπ—§π—˜π—˜π—Ÿ π—©π—œπ—˜π—₯π—Ÿπ—”π—‘π——π—˜π—‘ π—’π—©π—˜π—₯π—Ÿπ—˜π—š
Un reunion importante tambe cu a tuma luga ta e β€˜Justiteel Vierlanden Overleg’ cu ya pa hopi aΓ±a ta tumando luga y obviamente ta necesario pa tin continuidad di esey. Importancia di esaki ta cu tin un agenda strategico cu ora di bay e reunionnan na Hulanda tambe den e β€˜Justiteel Vierlanden Overleg’, por tin e puntonan di agenda cu ta importante pa Aruba. Un punto crucial ta e retonan cu Aruba ta wordo confronta cu ne na nos frontera.

β€œAyera mes nos tabata tin un caso y mi mester bisa, hopi bon trabou y cooperacion entre Guarda Costa y Cuerpo Policial caminda bo ta wak mas y mas nan ta cuminsa traha miho cu otro caminda a logra gara personanan cu a purba drenta Aruba. Asina bo ta mira mas y mas e instrumentonan cu a wordo poni na disponibilidad di tur e departamentonan aki manera un radar, mas boto riba lama y e helicopter. Bo ta mira nan ta mas sincronisa cu otro pa por traha miho cu otro”, Minister Tjon a duna di conoce.

𝗨𝗭𝗒 π——π—œ 𝗑𝗒𝗦 𝗔π—₯π—¨π— π—œπ—Ÿπ—Ÿπ—˜π—₯𝗦𝗑𝗔𝗑:
Un punto hopi importante tambe ta uzo di nos Arumillersnan. Minister di Husticia a expresa su satisfaccion cu tur e departamentonan den e cadena ta particamente wak e balor agrega tambe den e grupo aki. Den un futuro cercano lo bay wak tambe un maneho con lo por bay utilisa e coleganan aki miho den tur e retonan cu Aruba a wordo confronta cu ne. Esaki tambe ta un di e exigencianan of peticionnan di Hulanda den e landpspakket.

π—žπ—Ÿπ—”π—¦ 𝗑𝗒𝗕𝗒 𝗣𝗔 𝗕π—₯𝗔𝗑𝗗π—ͺπ—˜π—˜π—₯ 𝗬 π—œπ—‘π— π—œπ—šπ—₯π—”π—–π—œπ—’π—‘:
Minister Tjon a duna di conoce tambe cu dentro di poco lo haci anuncio caminda lo bay start un klas nobo pa Brandweer cu tin reto di vergrijzing den e departamento y otro klas pa Inmigracion cu pa hopi tempo caba tin e reto di falta di personal. Pa esaki ya tin fondonan presupuesta y e klasnan ta sumamente necesario pa e departamentonan aki.

β€œMi ta wak bek riba dos siman di trabou hopi druk pero sigur fructifero na unda hopi informacion a wordo treci dilanti door di e departamentonan. Mi ta gradici nan tur pa e tempo cu nan ta pone pa reuni cu mi y ta spera tambe di por tin bon cooperacion y conbersacionnan cu tur departamento den area di Husticia den e proximo 4 aΓ±anan”, Minister Rocco Tjon a duna di conoce.

Share this page to Telegram

This site uses Akismet to reduce spam. Learn how your comment data is processed.

%d bloggers like this: