Dikon tantu spantu i nerviosismo pa enkuesta parlamentario riba konstrukshon di hospital? Partido Inovashon Nashonal ta di opinión ku ta basta ku manipulashon di informashon. Ta ora pa pueblo sa kon un kambio di sitio a resultá den e gastunan èkstra pa CMC i e  problemanan di awe.

 

Dikon tantu spantu i nerviosismo pa enkuesta parlamentario riba konstrukshon di hospital?

Partido Inovashon Nashonal ta di opinión ku ta basta ku manipulashon di informashon. Ta ora pa pueblo sa kon un kambio di sitio a resultá den e gastunan èkstra pa CMC i e  problemanan di awe.

 

Partido Inovashon Nashonal (PIN) despues di a skucha e deklarashon di eks-miembro di parlamento sr. Melvin “Mac” Cijntje dia 29 di sèptember 2021 na un radio emisora, kaminda ela deklará enfátikamente ku e gastunan èkstra di kostrukshon di hospital ta bin dor añadí 3 òf 4 piso mas di kostrukshon na e hospital na Otrobanda. E ke sa ta ken a aprobá esei. Tambe sr. Cijntje a enfatisá ku Usona, representá pa sr. L.S. a duna un informashon kompletamente robes na nan komo miembronan di koalishon di e tempu ei. E la mustra di tin basta informashon pa divulgá den un enkuesta parlamentario. Di otro banda nos a tende sr. B. Whiteman na un emisora splika e rapòrt “Tussentijdse Evaluatie HNO” di 2016 kompletamente robes, ya ku na e momento ei apenas 1/3 parti di e hospital tabata trahá, i según e rapòrt na 2016 kaba a surprasá e presupuesto pa hospital nobo ku mas f. 100 mion. Ta mas kla ku di día ku manipulashonnan ta keda tresé i ku pueblo ta keda sin klaridat riba e proyekto aki.

 

PIN ta bolbe úrgi pa tene e enkuesta parlamentario pa trese klaridat e proyekto di HNO-CMC. For di ougùstus 2017, apenas un par di luna despues ku su líder a tuma e enkargo pa finalisá e hospital, Partido PIN ta e promé partido polítiko ku a insistí riba un enkuesta parlamentario. PIN ta puntra ki dia ta siguí ku un enkuesta parlamentario ròndo di HNO-CMC? Tin basta pregunta ku segun PIN mester trese klaridat riba dje. Akinan djis algun ehèmpèl.

 

Desishon pa stòp ku Fundashon Hospital Nobo

Ta konosí ku na momento ku gobièrnu MFK-PS na aña 2010 a tuma mando di país Kòrsou, a kita e proyekto pa traha un hospital nobo for di Fundashon Hospital Nobo, ku tabatin e eminesia dr. Bob Pinedo komo presidente. Na e momento ei ya basta ehersisio a ser hasí pa ku e konstrukshon i tabata kana e kamindanan pa yega na un finansiamentu di e konstrukshon. Te awe pueblo no sa kon bin a kambia e desishon pa konstrukshon di hospital banda di IFE na Jan Noorduynweg pa Amstel. Manera nos sa, e área na Amstel ta trata di un área ku a keda inundá durante tormenta Tomas. Kua investigashon a hasi pa kompará e sitionan di konstrukshon i kuantu esakinan a kostá?

 

Kon a kalkulá e gastunan pa konstrukshon di hospital na Amstel? E gastunan di infrastruktura rondó di Amstel, kaminda lo mester a hasi kambionan drástiko na tráfiko tambe a ser kalkulá? Kunatu e gastunan aki lo mester tabata? Tambe ta konosí ku  gobièrnu MFK-PS a skohe Ballast Nedam pa konstruí e hospital. Kua tabata e kriteria pa e eskoho hasí? Kuantu e rekompensa pa supervishon di proyekto dor Fundashon SONA i pa USONA i/o Berenshot pa manehá e ehekushon di e proyekto? 

 

Gastunan èkstra pa konstrukshon di hospital den Otrobanda.

Gobiernu PS, PAIS, PNP, Grupo Sulvaran, kabinete Asjes, ku a goberna for di 7 juni 2013 a tuma e desishon pa konstrukshon di hospital nobo den Otrobanda. A base di ki kriteria gobièrnu di PS-Pais-PNP-grupo Sulvaran a disidí di pone e hospital den Otrobanda? Segun e rapòrt di kontrolaria general no a traha un programa di eksigensha nobo pa e hospital den Otrobanda. Pueblo ke sa si por papia di un proyekto nobo i dikon no a traha un programa di eksigensha pa e konstrukshon den Otrobanda. Pueblo ke sa si a tene kuenta ku e gastunan pa kompra di Colon i rekompensashon pa e empresanan i hendenan ku tabata biba den Colon. Tambe si a tene kuenta ku mester a kibra klip pa konstrukshon di un garashi. Pueblo ke sa a base di kua kriteria i ken a disidí riba konstrukshon di un garashi di e tamaño ku a konstruí. Den e kaso aki tambe lo mester a rekonstruí Hamelbergweg. Ta konosí ku inisialmente a kalkula un suma ku despues a resultá kasi 4 bia mas kostoso pa konstrukshon di Hamelbergweg. Tambe, pueblo ke sa ku a tene kuenta ku   mester a basha parti di Sehos abou i pone por ehempel katerisatie afdeling otro kaminda. Kuantu ta e suma total di tur e trabounan adishonal pa konstrukshon di hospital den Otrobanda?

 

Según sr. Whiteman, ku tabata minister di GMN durante e periodo, ta trata di un proyekto nobo di konstrukshon di hospital. Pueblo ke sa dikón kabinete PS-PAIS-PNP, Grupo Sulvaran a mantené e konstruktor Ballast Nedam i a skohe SONA/USONA pa supervisá i manehá e proyekto. Si ta trata di un proyekto nobo, dikon no a tene un destaho públiko nobo? 

 

Vastgoedbedrijf i Exploitatiemaatschappij

Na 2013 gobièrnu PS-PAIS-PNP-Grupo Sulvaran a proponé pa bin ku un Vastgoedbedrijf i un Exploitatiemaatschappij komo kompanianan pa manehá e hospital. Tataba sr. Whiteman ku a firma Memorandum of Understanding ku Sehos na 2013 den kua lo a bin un explotatiemaatschappij i un vastgoedmaatschappij. Despues kabinete Whiteman I i II na 2015 i 2016 a mantené e desishon pa bin ku un Vastgoedbedrijf i un Exploitatiemaatschappij komo kompanianan pa manehá e hospital. Seguidamente kabinete Koeiman na 2017 a mantené e desishon pa bin ku un Vastgoedbedrijf i un Exploitatiemaatschappij komo kompanianan pa manehá e hospital. Kabinete Pisas I na 2017 a mantené e desishon pa bin ku un Holding, un Vastgoedbedrijf i un Exploitatiemaatschappij komo kompanianan pa manehá e hospital. Kabinete Pisas I a pidi hasta pa aselerá e ehekushon di e desishon pa bin ku un Holding, un Vastgoedbedrijf i un Exploitatiemaatschappij komo kompanianan pa manehá e hospital. Meskos ta konta pa e disishon di kabinete Pisas I a haña nesesario i a tuma desishon pa bin ku un Ministerieel Regisseur en Toezichthouder (MRT) i a presentá un landsbesluit pa gobernadora firma. Ku kua meta e desishonnan aki a ser tuma dor di e diferente kabinete nan? Pueblo ke sa si e desishonnan aki ku a kuminsa for di kabinete Asjes lo a nifiká ku pueblo no ta doño di su hospital. 

 

Gobiernu PAR, MAN, PIN, kabinete Rhuggenaath, 29 mei 2017-18 maart 2021

Ta bon konosí ku tur e erornan ku a keda konstatá den e relato di 2016 “Tussentijdse Evaluatie HNO” no a kondusí na korekshon dor di kabinete Whiteman II i e kabinetenan ku a sigui. Na yüni 2017 ora sra. Römer a tuma e enkargo, no tabatin relatonan finansiero di SONA for di 2013. Ta kabinete Rhuggenaath a pidi kuenta i rason i a para e plèitu entre SONA i kontratistanan pa por a sigui ku konstrukshon di hospital. Tambe a start ku e proseso di transishon di SEHOS pa CMC, kaminda mester e rekapasitá tur miembro di personal pa por traha den CMC. Pa realisá esei a pone hendenan kapas den e MRT ku a solushoná hopi claim di kontratistanan, kousá dor di desishonnan deskabeyá dor di e kabinetenan Asjes, Whiteman I i Whiteman II. Kabinete Ruggenaath a mantené e desishon pa bin ku un Holding, un Vastgoedbedrijf i un Exploitatiemaatschappij komo kompanianan pa manehá e hospital. Pa evitá mas gastu dor di retraso di konstrukshon i sali for di e problemanan serio di Sehos kabinet Rhuggenaath a sòru pa finansiamentu di e hospital a kana, inklusive ku e konsortio di institutonan finansiero. Pueblo ke sa kon esei a tuma lugá i kiko tabata e diskushon ku gobernador riba Hoofdlijnenakkoord.  

 

Enkuesta parlamentario

Importante ta ku den kuadro di un enkuesta parlamentario, parlamento por tende testigunan bou di huramentu. Ta e oportunidad pa tende tur e ministernan di turno di salubridat,  finansas, VVRP i minister presidentenan ku a tuma desishon den e proyekto di Fundashon Hospital Nobo, Nos Hospital Nobo i Hospital Nobo Otrobanda. Además ta imperativo pa skucha SONA, USONA, MRT, e konseheronan, sirbidónan públiko, kontratistanan i tur demás hende ku parlamento ke skucha. Di e forma aki por trese porfin e klaridat nesesario ken a tuma kua deshishon, ku ki konsekuensia, kuantu henter e proyekto a kosta i na kiko e sènnan a bai. 

 

Konklushon

For di 2016 tin un rapòrt ku ta mustra ku gastunan di HNO lo ta hopi mas haltu ku a kalkulá den prinsipio. E rapòrt ta mustra riba e riesgo ku ta hasi e gastunan bira dòbel. Ta importante pa trese klaridat kuantu eksaktamente a gasta na konstrukshon di hospital i tur lokual ta rondo di dje.  Ta importante pa  enkuesta parlamentario mustra kon tur kos a bai. E pueblo pagadó di impuesto meresé otro, i ta basta keda bin ku kalumnia i historianan mal konstrui.

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: