Djaluna 11 di òktober ta lansa wèpsait pa yega na un prueba digital di bakunashon

 

Djaluna 11 di òktober ta lansa wèpsait pa yega na un prueba digital di bakunashon

Geplaatst op 09 October 2021 dor di Ministerio Asuntunan General i Promé Minister

WILLEMSTAD – Esnan ku ta biaha di Kòrsou pa Oropa próksimamente, tin e oportunidat pa apliká pa un prueba di bakunashon digital den forma di un ‘Digital Covid Certification’ (DCC). E prueba digital akí ta un manera aseptá i fásil pa por kontrolá si un persona ta bakuná. Na Hulanda i diferente otro pais na Oropa, mester mustra e prueba digital na entrada di nan pais i asta ora ku ke bishitá restorant, teatro i eventonan públiko. E grado haltu di bakunashonnan bou di nan komunidat kombiná ku e prueba riba bakunashon, a pone ku na Hulanda por a suavisá mayoria medida den kuadro di COVID-19.

Banda di usa e prueba na Oropa, riba término kòrtiku tambe ta bai usa e DCC di Kòrsou pa kontrolá pasaheronan ku ta bini Kòrsou for di Oropa. Den e periodo ku ta sigui tambe ta hasi e último trámitenan pa por usa e DCC lokal,  entre otro na eventonan farandulero i deportivo kaminda mas ku 100 hende ta aglomerá. Aplikashon pa e DCC na Kòrsou den forma di un QR-code, ta posíbel riba e wèpsait www.curacaohealthapp.com entrante djaluna, 11 di òktober 2021 for di 11’or di mainta. Pa por bini na remarke pa e DCC mester tin un karchi di bakunashon bálido. Por lo pronto ta personanan kompletamente bakuná so ta bini na remarke.

Lansamentu di e wèpsait www.curacaohealthapp.com ta e promé fase den e proseso pa yega na un aplikashon digital pa iOS i Android smartphones kaminda tambe lo por pidi i mustra e prueba digital. Asina ta bira mas fásil pa e usuario por mustra algu ora ta hasi kontrol.

Mientrastantu ta posibel tambe pa ‘print’ un prueba di e QR-code riba papel pa esnan ku no tin telefòn digital. Ku e posibilidat akí no ta nesesario mas pa bai Utrecht pa pidi un QR-code pa uso na Oropa, kual ta un proseso ku por a tuma sigur dos siman. Sí ta rekomendá pa pidi e prueba via di e wèpsait sigur 48 ora promé ku mester biaha. Den e próksimo simannan Gobièrnu di Kòrsou lo duna mas informashon tokante uso di e prueba digital i kon pa yega na dje.