𝘔𝘪𝘯𝘪𝘴𝘵𝘦𝘳 𝘌𝘯𝘥𝘺 𝘊𝘳𝘰𝘦𝘴: 𝗗𝗘𝗦𝗗𝗘 𝗘 𝗦𝗜𝗠𝗔𝗡 𝗔𝗞𝗜 𝗭𝗪𝗘𝗠𝗟𝗘𝗦 𝗡𝗔 𝗦𝗖𝗢𝗟𝗡𝗔𝗡 𝗕𝗔𝗦𝗜𝗖𝗢 𝗟𝗢 𝗜𝗡𝗜𝗡𝗖𝗜𝗔 𝗕𝗘𝗞.

Minister di Enseñansa y Deporte Endy Croes a anuncia cu entrante 14 di october, les di landamento por start bek na scolnan basico. Esaki ta posibel awor cu a soluciona e reto cu contract di instructornan di landamento y tambe door cu a aloca fondo necesario pa paga pa e transporte pa e muchanan cu ta haya e les.

Tabata siman pasa cu Minister Croes a informa cu a yega na un solucion pa e problema di pago pa ‘zweminstructeurs’. A base di conseho cu a pidi y ricibi di departamento di recurso humano (DRH) a tuma e decision cu lo aloca e instructornan bek bou di Dienst Publieke Scholen (DPS), bou di e contract cu nan tabatin anteriormente y cu nan a traha cu ne/conoce pa 28 aña.

Banda di esaki, un otro bon noticia cu tin tur esnan concerni y envolvi den e proceso sumamente contento ta, e hecho cu a resolve un otro problema pa cual muchanan no por a haya les di landamento na scol. Pa motibo di falta di fondo pa percura pa transporte di e muchanan cu mester haya les di landamento, Minister Croes a duna di conoce cu a percura pa aloca e fondo necesario pa esaki esta 300 mil florin for di su propio presupuesto.

Di e forma aki e siman aki ta soluciona otro reto, busnan ta cuminsa core y desde 14 di october zwemlesnan ta inicia, Minister Croes a termina bisando.