HUMA – Trint’i Mei , Lantamentu Anunsiá

HUMA – Trint’i Mei , Lantamentu Anunsiá

Fundashon NAAM a presentá den Teatro Luna Blou, un seri di dokumental titulá; HUMA Trint’i Mei, Lantamentu Anunsiá. Durante e anochi a presentá tres kapítulo di e seri na invitadonan ku a partisipá den e dokumental, fondo i spònsernan, kolaboradó, dignatario i prensa. German Gruber Jr. a skibi i dirigí e dokumental.
E dokumental ta un kontinuashon di e proyekto “50 aña 30 di Mei – Te Aki, Ban Sigui” pa konmemorá sinku dékada di Trinta di Mei 1969 ku Fundashon NAAM a lansa na 2019. Un eksposishon a rekoré seis bario den un bus i tabata inkluí Teatro Foro, un produkshon di Virtual Reality i un programa edukativo pa skol pa yuda alsa konosementu di pueblo di Kòrsou tokante e komunidat di e tempu ei i e susesonan ku a akumulá pa yega na 30 di mei 1969. E seri di dokumental ta un manera pa yega muchu mas serka di pueblo di Kòrsou ku e historia aki.
Segun Dimitri Cloose, direktor di Fundashon NAAM, e seri di dokumental aki, lo yuda amplia e narativo “Nan a kima Punda” ku pa sinkuenta aña largu a keda kontá i ripití. Huntu nos ta forma nos historia pa nos por siña di otro. Ta e afan ku e dokumental akí lo lanta e konsenshi ku tin muchu mas pa konta di nos historia.
Minister van Heydoorn a menshoná e importansia di eduká nos kultura. Kultura ta bibu i historia mester fortifik’é. Nos historia no ta skibí solamente den un buki, e ta biba den e mente kolektivo di e pueblo.
German Gruber Jr. a debutá na 2008 ku e pelikula ‘E leyenda di Buchi Fil’, na 2013 e a presentá ‘Sensei Redemption’ i na 2016 e seri di televishon ‘Djis un tiki love’. E parti mas importante di e dokumental tokante di 30 di Mei 1969 segun German ta ku e nò a traha ku un skrept fiktivo, pero ku historia oral.
E protagonista ku a biba e parti importante akí di nos historia, lo konta su eksperensia.
Komo direktor e a duna nan e espasio pa kompartí nan eksperensia na nos. German ta hopi gradesido na tur ku a kolaborá i duna nan aporte. Huntu ku esnan entrevistá e a haña espasio pa duna nan historia forma, i present’é na un manera ku e ta kere públiko por apresiá. Kompañá ku informashon históriko, e públiko ta haña sintimentu, pensamentu i reakshon di tur e hendenan akí huntu. Gruber a enfatisá su apresio pa por a hasi e produkshon akí huntu ku Fundashon NAAM.
E seri di dokumental HUMA Trint’i Mei, Lantamentu Anunsiá tin diesun kapítulo, di mas o ménos 20 minüt ku lo ta disponibel riba wèpsait di Fundashon NAAM, http://www.naam.cw. Kada dos siman lo lansa un kapítulo nobo. Keda pendiente pa estreno digital pa públiko.
Ku e bista riba enseñansa i skol, Fundashon NAAM lo ofresé guia pa uso di e seri dokumental pa e parti didáktiko i uso den klas. Dosentenan ku ta interesá lo por tuma kontakto ku Fundashon NAAM.
Djaluna 18 di Òktober e mesun presentashon aki lo tuma lugá na De Balie den Amsterdam na Hulanda. Dimitri Cloose i German Gruber Jr. lo sigui e evento via live streaming pa despues komuniká ku públiko presente.