UNION POSTAL DI AMÉRIKA, SPAÑA I PORTUGAL TA APERTURÁ KONGRESO KU TUR PAIS DEN E UNION KU KÒRSOU PRESIDIENDO E KONGRESO

 

UNION POSTAL DI AMÉRIKA, SPAÑA I PORTUGAL TA APERTURÁ KONGRESO KU TUR PAIS DEN E UNION KU KÒRSOU PRESIDIENDO E KONGRESO

Willemstad 18 di òktober 2021– ‘Unión Postal de las Américas, España y Portugal’(UPAEP), ku ta konta ku 28 pais miembro, ta tene su di 24 kongreso te ku djabièrnè próksimo aki na Kòrsou. Kada 4 aña UPAEP ta tene su kongreso pa stipulá e maneho i strategia pa e union postal pa e próksimo 4 aña.  Djaluna dia 18 di Òktober a aperturá e kongreso ku ta konta ku partisipashon di 25 pais di e union, mas 4 pais, i tambe representantenan di Nashonnan Uní. Kòrsou, den persona di Sr. Franklin Sluis, a keda eligí pa dirigí e kongreso aki.  E union postal ta trata temanan relatá na e agenda di mas aña delineá pa Union Postal Universal (UPU) i lo elaborá riba formanan pa fortalesé e posishon di servisionan postal ku ta forma parti di e union postal. 

Minister enkargá ku Tráfiko, Transporte i Planifikashon Urbano Sr. Charles Cooper, durante di un konferensha ku a tuma lugá na okashon di e kongreso aki, a bisa ku e kongreso aki un biaha mas a demonstrá ku ora nos pone esfuerso huntu nos ta produsí riba un nivel haltísimo.  Den pasado kaba nos a yega di prueba ku nos por organisá kongresonan importante asinaki i laga un i tur ku tremendo palabra pa e loke nos ta presta.  Gobièrnu ta sostené i ta apoyá e tipo di empeñonan aki ku tin balor agregá haltu pa nos pais.  Prueba di e kompromiso aki tabata presensha di Ministernan ku ta forma parti di Gabinete Pisas na e promé dia di e kongreso.

E Sekretario General di UPAEP, Sr. Roberto Cavanna Merchán, a bisa ku a elihí Kòrsou pa aklamashon den e posishon lider den e union.  E eskoho ta basá tambe riba e modelo ku Kòrsou ta poseé pa loke ta trata e tipo di desaroyonan ku organisashonnan postal mester sigui, pero tambe e régimen regulatorio ku Kòrsou tin.  E la suprayá ku Kòrsou lo tin un responsabilidat pa guia e union postal rumbo pa desaroyonan inovativo nesesario pa e entidatnan postal por kumpli ku e retonan modèrnu.

Sr. Franklin Sluis di su banda a mustra ku parti di e vishon ta pa hasi uso di e sinergia i e kolektividat di e union, pa atendé ku faktornan ku por benefisiá tur miembro.  Komo kolektividat bo por negoshá muchu mas mihó i logra mihó benefisio pa kada pais.  E la bisa tambe ku su meta ta pa vosiferá mas fuerte di e union den  desaroyo postal mundial.  Durante di e kongreso, ku ta tuma lugá na Kòrsou, e miembronan di UPAEP lo profundisá riba e plan di desaroyo pa UPEAP den lus di e plan di desaroyo ku UPU a stipulá pa e próksimo añanan.

CEO di  C-Post International, Sr. Thomas Roggendorf, a bisa ku servisionan postal ta operá a base di tratado i akuerdonan entre paisnan.  Unionnan postal manera UPEAP ta fasilitá esaki i ta dirigí e direkshon ku nos ta move, rumbo pa futuro. C-Post International ta orguyoso di por ta amfitrion di e kongreso aki na Kòrsou, huntu ku BT&P, i p’esei a emití tambe un stampia speshal na okashon di e di 24 edishon di e kongreso di UPAEP.

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: