Gerensia di SDKK ta desmentí ku kliente a pèrdè 4 dede den prizòn.

 

Gerensia di SDKK ta desmentí ku kliente a pèrdè 4 dede den prizòn.

WILLEMSTAD- Resientemente gerensia di prizòn a tuma nota di un informashon publiká den medionan di komunikashon enkuanto un kliente enkarselá ku a pèrdè 4 dede den prizòn pa motibu di mal kuido.

Gerensia di prizòn ta desmentí i lamentá esaki, debí ku esaki ta hasi daño na imágen di prizòn, i tambe na profeshonalismo di personal di departamento médiko.

Gerensia di prizòn ta informá ku a hiba kòmbersashon ku e kliente enkuanto e publikashon. E kliente a informá ku ta outoridat a tir’é, ku konsekuensia ku el a bin pèrdè su 4 dedenan durante di su tratamentu médiko na CMC. Pa aklará: for di e kliente su ingreso den prizòn, e kliente tabatin un dede so na su man. Despues el a kontinuá ku su enkarselashon den prizòn, kaminda el a sigui risibí kuido i ningun momento no tabatin asuntu di bichi.

Tambe e kliente a informá gerensia di prizòn ku ta promé biaha el a bin Kòrsou. E no tin ningun famia i amigu aki pa por bai medionan di komunikashon ku informashon inkorekto.

Gerensia di SDKK ke enfatisá ku informashon asinakí por hasi daño tantu na e instituto komo nos pais.