Minister di Desaroyo Ekonómiko, sr. Ruisandro Cijntje a bishitá konferensia krusero di Florida-Caribbean Cruise Association (FCAA) organisá na Panama.

Minister di Desaroyo Ekonómiko, sr. Ruisandro Cijntje a bishitá konferensia
krusero di Florida-Caribbean Cruise Association (FCAA) organisá na Panama.

Panama – E konferensia di FCCA tin komo meta pa stimulá desaroyo di turismo
krusero, kaminda diferente tópiko ta bin dilanti manera asuntunan portuario,
seguridat, merkadeo i otro temanan relevante pa adelanto di e industria krusero.
Durante di e 4 dianan di e konferensia Minister Cijntje i su delegashon a reuní ku
vários ‘stakeholders’ pa asina yuda alsa e produkto krusero na Kòrsou. Minister
Cijntje a sostené un bishita di kortesia ku embahadora di Hulanda na Panama sra,
Ilse Smits i su suplente dr. Michael Rauner.
Tambe Minister Cijntje a reuní ku ehekutivonan di tres diferente liña krusero den
seshon individual ku kada kompania, esta Royal Caribbean Cruise Lines, Carnival
Cruise Lines i tambe MSC Cruises. Tur tres kompania a ekspresá nan disponibilidat
pa ofresé mas di nan servisio i produkto na nos isla i a deliberá riba strategianan
pa yega na mas kolaborashon entre nos isla i nan respektivo liña krusero. E liña
kora di e reunion tabata rekuperashon di e industria i mas bishitante pa Kòrsou.
Lo bai traha pa hasi posibel entre otro interport cruising. Esaki ta enserá ku den
futuro, turistanan (pa un vakashon kombiná) i lokalnan tambe lo por subi barku
for di Kòrsou.
Ta asina ku miembronan di Ports Authority di Colombia, Panama, Aruba i Kòrsou a
sinta huntu riba e tópiko di interporting i tin tur intenshon di trese bèk e ruta ku
Pullmantur tabata kubri den sur di Karibe. E koperashon entre e paisnan den Sur
di Karibe tambe lo hasi interporting bira realidat .
E strategianan di koperashon den region tambe a keda trese dilanti durante di un
enkuentro ku Minister di TEATT di St.Maarten, sr. Roger Lawrence. Kòrsou tin
hopi potensial pa engrandesé e sektor krusero i por konta ku kolaborashon di
Minister di Turismo di St.Maarten pa esaki.
E mesun idea di koperashon a keda ekspresá durante di e enkuentro ku sr. Albert
Elens di Maduro Shipping pa ABC Islands pa asina nos por reakshoná mas efektivo
riba nesesidatnan den e industria krusero i hasi mas uso optimal di e
oportunidatnan ku presentá.
E destinashon di Karibe ta esun ku mas interes den e mundu krusero sigun un
resúmen di un “report” ku minister a risibí serka sra. Michele Paige, presidente di
FCCA. Sra Paige a elaborá spesífikamente riba Kòrsou komo destinashon i riba
puntonan di atenshon pa asina brinda un mihó servisio na nos bishitantenan.
Finalmente, Minister Cijntje a reuní ku funshonarionan portuario di Kòrsou i
Aruba pa asina reforsá otro pa konhuntamente por risibí mas liña krusero den sur
di Karibe.

 

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: