Ministernan ta hasi un rekorido di Parke di Palu di Mangel 

Ministernan ta hasi un rekorido di Parke di Palu di Mangel 

 

Willemstad – Ministernan Sr. Charles Cooper, Sra. Dorothy Pietersz-Janga, Sra. Ruthmilda Larmonie-Cecilia, Sr. Ruisandro Cijntje, i Sr. Sithree van Heydoorn, a hasi un rekorido den e Parke di Palu di Mangel den e área di Rif pa e por tuma nota di e desaroyo di e bunita proyekto aki. Hefe di Domeinbeheer, Sr. Jairo Martis, a guia e rekorido aki. 

 

E Parke di Palu di Mangel 1 ta keda entre Courtyard i Corendon, i ta eksperensiando avansenan grandi. A hasi un konekshon entre e parke ku laman pa asina awa limpi por a kuminsa sirkulá. Tambe a stòp di basha awa sushi den e parke, maske ku tin deskonosínan ku resientemente a hasi esaki, kual ta di lamentá. 

 

Ta atendiendo ku henter e sistema di riolering den e área aki. Tambe a krea un ‘boardwalk’ pa hende por kana i disfrutá di e bunita flora i fauna ku tin den e parke tremendo aki. Den e parke tin un toren tambe kaminda bo por subi i disfrutá di e paisahe for di un altura.

 

Asina ku e parke ta kla, Carmabi lo manehá esaki i e lo habri ofisialmente pa públiko, tantu nos suidadanonan komo nos turistanan, por bishitá.

 

Minister Cooper ta satisfecho ku e avansenan ku el a tuma nota di dje, i ta pone su skouder bou di e proyekto aki pa e finalisá pa pueblo di Kòrsou.