Hunta di supervishon atministrativo

E Hunta di Supervishon Atministrativo (Beheerraad) a keda establesé pa e lei di Reino i ta formando parti di Korte Komun di Hustisia for di 10 di òktober 2010. E Hunta di Supervishon Atministrativo tin dos tarea prinsipal. Na promé lugá nan ta kontroladó di e operashon diario di Korte. For di e tarea ei e Hunta di Supervishon Atministrativo ta kontrolá e ehekushon di e plan anual i presupuesto, tambe nan ta enkargá ku e kuenta anual. Banda di esaki periódikamente -alrededor di 5 pa 6 luna pa aña- nan ta deliberá ku bestür tokante kuestionnan di maneho riba e tereno di operashonan diario manera implementashon di sistema nobo di IT, maneho di trahadó, maneho finansiero i maneho di filialnan i tambe ehekushon di esakinan. Konforme lei di Reino e Hunta di Supervishon Atministrativo ta e dunadó di trabòu ofisial di funshonarionan hudisial i empleadonan eksterno (buitengriffiers) tambe. E Hunta di Supervishon Atministrativo ta konsultá tambe regularmente ku e auditor eksterno tokante resultadonan ku tin di haber ku funshonamentu di e operashonnan di e ‘bedrijfsvoering’.

E segundo tarea di e Hunta di Supervishon Atministrativo ta konsultá ku ministernan di Hustisia di e paísnan tokante e presupuesto i responsabilidatnan finansiero di Korte. Pues e Konseho di Atministrashon ta realmente e konekshon entre e Konseho di Atministrashon i e paísnan. E Hunta di Supervishon Atministrativo ta forma e bùfer entre polítika i hustisia independiente.

Plan anual 2019
Anualmente, promé ku e komienso di un aña nobo, Hunta di Supervishon Atministrativo ta nombra e temanan mas prinsipal ku nan ke mira realisá. E temanan prinsipal ku nan tin pa 2019 ta:

• Sigui profeshonalisá e organisashon. Importante ta redukshon di risikonan den e organisashon, drecha e kòntròl interno;
• finalisá implementashon di e sistema nobo di registrashon di kasonan, ku ta pone ku ta trese mihó bista riba progreso di kasonan;
• Kuminsá ku un Hofacademie, kaminda ta ofresé kapasitashon i trénen na empleadonan di Korte ku ta resultá den subida di profeshonalismo.

Revisashon di gastunan
Pa yega na e presupuesto di Korte, ta hasi uso di un sistema ku pa kada kaso ta konta ku preis (kostprijs). E gastunan ta wòrdu multipliká pa e kantidat di kasonan presentá pa kada país, loke ta yama ínfluks di e kaso, di un temporada anterior. Di e manera aki e paisnan ta paga nan kontribushon anual na Korte, a base di e kasonan ku a drenta multipliká pa e ‘kostprijs’..

E Lei di Reino ta eksigí ku un bes den tres aña Korte ta evaluá e preis di kosto i stipulá esakinan. Esaki mester sosodé pa aña 2020 te ku 2022. A base di entrevistanan ku un kantidat grandi di empleado di Korte, i kalkulashon di tempu, ta determiná kuantu ta e promedio di tempu ku ta keda dediká na un kaso. E gastunan di Korte, ku ta konsistí di gastunan direkto i indirekto pa kada kategoria di kaso, ta wòrdu kalkulá a base di e tempu dediká na e diferente kategorianan di kaso. Debí na esaki e kosto di preis korekto ta wòrdu klakulá pa e periodo di gastu nobo. Durante e proseso un accountant eksterno ta verifiká si e proseso ta kana segun lei i reglanan stipulá. E accountant ta traha riba petishon di e Hunta di Supervishon Atministrativo.

Miembronan di e Hunta di Supervishon di Atministrashon

E Hunta di Supervishon Atministrativo ta konsistí di representantenan di Aruba, Kòrsou, Sint Maarten i un representante di islanan BES. E paisnan ta presentá nan miembronan i pa medio di un Dekreto Real nan ta wòrdu nombrá pa un periodo di 5 aña.

Señor Hans Janssen RA
E presidente di e Hunta di Supervishon Atministrativo ta Señor Hans Jannsen, miembro na nòmber di islanan BES i ta biba na Woerden (Hulanda). Den su bida diario Señor Janssen ta un miembro di hunta no-hudisial di Korte di Amsterdam i prinsipalmente enkargá ku maneho operashonal i proyektonan grandi (digitalisashon i re-ubikashon) di e korte na Amsterdam. For di su antesedente i eksperiensia sr.Jansen tin un bista amplio riba maneho di organisashonnan grandi(den kambio). Sr. Janssen ta for di 2016 nombr’a miembro di Hunta di Supervishon Atministrativo.

Señora Grace Maduro
E vice-presidente di e Hunta di Supervishon Atministrativo ta Sra. Grace Maduro, ku a keda nombrá pa un periodo mas dor di Pais Aruba. E ta doño i direktor di un negoshi ku ta bende tur kos pa kurá. Dor di su funshonnan ku el a ehersé den pasado na entre otro Hòspital di Aruba i KPMG Señora Maduro ta spesialisá den asuntunan di personal i organisashon. Sra. Maduro ta miembro di e Hunta di Supervishon Atministrativo for di 10 di òktober 2010 a keda re-nombrá na 2016 pa un periodo di 5 aña.

Señor Frank Haze
Na nòmber di país Kòrsou Sr. Frank Haze a keda nombrá miembro di Hunta di Supervishon Atministrativo na yanüari 2017. Sr. Hanze ta spesialista hurídiko den e Hunta di Supervishon Atministrativo. Promé ku el a baha ku penshun, ela traha entre otro komo grefir di Staten di Antias Hulandes. Banda di su miembresia den e Hunta di Supervishon Atministrativo, Sr. Hanze ta fungi diferente funshon na nivel di maneho i e tin un netwerk sosial bastante amplio.

Señor Kelvin Bloyden
Sr. Kelvin Bloydenta ta miembro di e Hunta di Supervishon Atministrativo for di 10 di òktober 2010. E ta representá Pais Sint Maarten. Den su bida diario e ta direktor athunto di Windward Island Bank Sint Maarten. Banda di esaki ela ehekutá diferente funshon di maneho na entre otro GEBE, Telem, Harbour i SLS. Señor Bloyden ta e spesialista finansiero i tin un netwerk bastante amplio, tantu na Sint Maarten komo na Kòrsou. Na 2016 el a keda re-nombrá pa un periodo di 5 aña.

Señor André Lievaart
E Hunta di Supervishon Atministrativo ta hana sosten di un sekretario.E sekretario ta mantené kontaktonan diario ku bestür i e otro paísnan, e ta sòru pa e miembronan di e Hunta di Supervishon Atministrativo risibí informashon korekto. E funshon di sekretario ta parttime i ta keda realisá pa señor André Lievaart.