“Risibi bo permit sin kamind’i krus” Kita barera pa rebibá ekonomia, paso den temp’i ‘gera’ no tin misa.

 

 

“Risibi bo permit sin kamind’i krus”

Kita barera pa rebibá ekonomia, paso den temp’i ‘gera’ no tin misa.

 

Willemstad — Ta papia hopi di fasilitá esnan ku kièr kuminsá nan negoshi. Tòg ainda e kaminda ta unu di krus. Esnan ku ke invertí, buskando e pèrmitnan nesesario, mester pasa di lokèt pa lokèt, moviendo papel i koriendo tras di stèmpel i stampia. Pero por otro. Ketu bai fihando riba e nesesidat pa pusha nos ekonomia strukturalmente, Partido PIN ta proponé pa kombertí e sistema di pèrmit adelantá, den un sistema di registrashon i kumplimentu (compliance) ku kondishonnan general, mará na chekeo despues. Asina ta generá mas entrada pa gobièrnu mas lihé, e invershonista ta skapa gastu, tempu i molèster, anto kuponan di trabou ta habri mas lihé.

 

Kamind’i krus 

PIN a tuma nota ku kondishonnan mará na e diferente pèrmitnan ta basta standarisá. Di otro banda, esun ku pidi pèrmit mester warda muchu  largu  promé k’e optené su pèrmit. Kasonan di invershonista ku a fada lagumai of bai un otro isla pa motibu ku nan a warda demasiado ta bon konosí.

Aserka ta bin ku vários pèrmit, manera pèrmitnan basá riba Lei di Molèster pa diferente motibu ya pa algun aña no ta keda kla. Den kasonan asina, a i ta tolerá ku empresanan di tur tamaño ta start operashon promé ku nan pèrmit di molèster keda kla.

Riba dje ta opvio ku e aktual  sistema di kouchi boulo pa otorgá pèrmit, ta yuda krea korupshon tambe.

 

Kondishonnan General

Pa fasilitá i aselerá invershon ekonómiko, kreando trabou i entrada pa gobièrnu, por kombertí e kondishonnan ku den tempu ya a bira standart pa pèrmit, den normanan, o sea kondishonnan general ankrá den lei. E kontrol ta bin despues. Naturalmente mester kompañá un kambio asina ku informashon amplio via tur kanal. Asina esun ku ke invertí lo sa e kondishonnan ku e mester kumpli kuné pa por start.

Den kaso ku e invershonista tin nesesidat di sosten profeshonal pa identifiká i komprendé e pèrmitnan ku e mester, e por akudí na instansianan di gobièrnu manera Cinex òf kualke konsehero empresarial lokal.

 

Registrashon i kòntròl

Unabes e invershonista konosé e kondishonnan general aplikabel pa su empresa, e por registrá su empresa via un portal online na tur e instansianan ofisial manera Kámara di Komèrsio, SVB i e diferente ofisinanan gubernamental. Pa kada tipo di registrashon i segun grandura di e empresa, e invershonista ta paga via e portal i risibí un komprobante di registrashon.

Empresanan manera por ehempel un planta kimiko ku por tin impakto hopi grandi riba medio ambiente i naturalesa òf merkado lokal, si mester warda pa haña un pèrmit (general) despues di kòntròl di gobièrnu. Di mes, den kaso ku gobièrnu intervení den merkado i dekretá un máksimo kantidat pa sierto empresa, e sistema di registrashon lo mester nenga e registrashon.

Gobièrnu mester organisá e registrashon aki di tal manera ku henter e aparato públiko ku mester kontrolá despues, tin akseso na e registrashon pa asina fasilmente por chèk si berdat e empresario ta kumpli ku e normanan òf kondishonnan general. E sistema aki mester bai kompaña tambe ku un instrukshon kla i transparente tokante sankshon den kaso di nò-kumplimentu.

 

PIN ta urgi gobièrnu pa awor si kuminsa tuma ekonomia na serio i kana ku e proposishon aki, mas ainda paso tin mas pensamentunan asina ku por parte ya tabata den preparashon.

Ta na bienestar di tur hende pa Kòrsou sali lihé for di e krisis aki. Pa esei sosode, mester fasilitá desaroyo ekonómiko pa asina trabounan nobo habri purá.