Desaroyonan den areglonan di sosten empresarial
Desaroyonan den areglonan di sosten empresarial
Geplaatst op 02 November 2021 dor di Ministerio Desaroyo Ekonómiko
Willemstad- Adaptashon di e rekisitunan pa aplikashon di Sosten pa Empresarionan Individual (TBZO) pa luna di yüli, ougùstùs i sèptèmber, a kousa sierto retonan pa e proseso di aplikashon i evaluashon di e petishonnan. Mirando esaki, Minister di Desaroyo Ekonómiko a haña aprobashon di Konseho di Minister pa trese adaptashon den algun di e kriterionan pa e empresario individual por bini na remarke pa e sosten di TBZO pa e luna nan di yüli 
te ku sèptèmber 2021. Ademas, mirando ku e ekonomia di Kòrsou a kuminsá normalisá poko poko bèk i teniendo kuenta ku e situashon finansiero delikado di nos pais, Konseho di Minister a disidí tambe ku lo deskontinuá tur areglo pa sosten empresarial (esta tantu TBZO komo NOW) despues di a prosesá i paga e sosten te ku e luna di sèptèmber 2021
E adaptashonnan ku Konseho di Minister a bai di akuerdo kuné pa aplikashonnan di TBZO di yüli te ku sèptèmber 2021, ta enserá lo siguiente:
- e eksigensia pa e empresario entregá tur komprobante di gastunan fiho (komersial) pa por bini na remarke pa sosten finansiero lo no ta aplikabel mas pa e petishonnan di e periodo menshoná. Sinembargo, e empresario ta keda ku e obligashon pa entregá un relato adekuá di tur su gastunan mensual (“kostenoverzicht”);
- e empresario ku no tin un deklarashon di impuesto di aña 2020 (“aangifte inkomstenbelasting”) i ku a hasi un petishon na Inspektor di Impuesto pa hasi su deklarashon di entrada di aña 2020 mas lat, su petishon por keda solamente atendé ku un komprobante di entrega di e petishon ariba menshoná (“uitstelverzoek”), huntu ku e deklarashon di impuesto di entrada entregá pa aña 2019;
- e eksigensia ku empresarionan individual lo mester partisipá na un trayekto di coaching i entrenamentu serka MiNEGOSHI lo no ta aplikabel mas pa e petishonnan tokante e periodo menshoná, mirando ku a konstatá ku mayoria empresario ku a apliká ya a yega di partisipá anteriormente na un òf mas di e trayektonan akí.
Aparte di e adaptashon nan ariba menshoná, tur sobra 
rekisitu ta keda vigente pa bini na remarke pa sosten di TBZO. E adaptashonnan ta konta tambe den evaluashon di e petishonnan ku ya a wòrdu entregá. Den e dianan benidero, e empresarionan ku a apliká anteriormente i ya ta bini na remarke pa risibí e sosten, lo kuminsá risibí e pagonan konserní.
Empresarionan individual ku anteriormente no a apliká komo ku kisas nan tabata falta kumplimentu ku e rekisitunan ku anteriormente tabata nesesario i ku awor si por kumpli ku e rekisitunan nobo, por manda un mail na empresario@fondodisosten.org pa asina tòg risibí informashon nesesario pa apliká pa e sosten pa empresarionan individual (TBZO).
Empresarionan individual ku tin kualke pregunta tokante e adaptashonnan introdusí den e trayekto di sosten na empresarionan individual (TBZO) òf si tin mester di informashon adishonal, por tuma kontakto ku e team di MEO na empresario@fondodisosten.org òf telefónikamente via 462-1444 ekstenshon 138 durante oranan di ofisina.
Aparte di e proseso pa ku e areglo di TBZO, mester menshoná ku no a bini ningun adaptashon pa loke ta trata e areglo di NOW. Esaki ta nifiká, ku tantu e prosedura komo pago di NOW ta sigui kana su kaminda normal i den e dianan benidero empresanan ku ta bini na remarke lo por kuminsá risibí e pagonan di NOW tambe.