Renobashon i optimalisashon di Edifisionan di Skol

Renobashon i optimalisashon di Edifisionan di Skol

E trayekto pa yega na un rapòrt relashona ku renobashon i optimalisashon di
estado di edifisionan di skol ta yegando su punto final
WILLEMSTAD – Manera ya konosí gobièrnu di Hulanda a pone 30 mion Euro
disponibel pa renobashon di skolnan aki na Kòrsou. Na komienso di e aña aki
Hulanda a manda pa Kòrsou mei mion Euro pa hasi renobashonnan urgente na
diferente skol, e renobashonnan aki a tuma lugá i ya mayoria di e situashon ku
tabata urgente a ser remediá.
Despues di a huramentá dia 14 di yüni último, Minister di Enseñansa, Siensia,
Kultura i Deporte (ESKD) sr. Sithree van Heydoorn a kuminsá traha mesora huntu
ku Ministerio di enseñansa di Kòrsou i Hulanda, pero tambe ku e kompania di
konsultant Policy Production ku Hulanda a enkargá pa hasi un estudio riba e
situashon di e edifisionan i den ki estado nan ta, pero tambe mester a traha un plan
di maneho ku ta konsistí di diferente komponente relashoná ku mantenshon di
skolnan.
E estudio aki mester indiká entre otro kon un skol moderno ku mester ta ekipá ku
tur e komponentenan ku un skol moderno mester dispone di dje, manera
infrastruktura di kòmpiuter pa e trayekto di digitalisashon ku ta andando i ta
sumamente importante. Direktivanan di skolnan tambe a haña partisipashon den e
trayekto aki i a hiba kombersashon ku tantu e representantenan di Ministerio di
ESKD di Kòrsou i Hulanda, pero tambe e konsultant ku ta ehekutando e trabounan.
Despues di Minister su biahe pa Hulanda siman pasa nos por informá komunidat,
ku den desèmber próksimo e rapòrt final lo ta kla. E rapòrt final aki lo kontene e
siguinte informashon;
1. Lo tin un relato di tur loke a ser konstatá, durante di inventario ku a wòrdu
hasi;
2. Tambe lo tin normanan pa skolnan ku ta para bashí, norma pa mantenshon i
tambe norma pa ku e konsentrashon di kantidat di muchanan ku ta bai skol
den un area spesífiko;
3. Lo bin un konseho kon den diferente fase lo hasi mantenshon na e skolnan.
Den e promé fase lo hasi mantenshon di entre 6 pa 7 skol na un balor di mas o
ménos 6 mion Euro;
4. Tambe lo bin un konseho kon pa yega ku un plan stratégiko pa mantenshon i
konsentrashon di skolnan, esaki teniendo kuenta ku e resultado di e
investigashon inisial (nulmeting) ku ta tumando lugá i e normanan ku ta ser
stipulá.
Nos lo sigui hasi tur loke ta nos alkanse pa optimalisá nos enseñansa, pero tambe pa
edifisionan di nos skolnan ta den un estado agradabel ku sigur lo kontribuí na
desaroyo di nos yunan.
Minister Sithree “Cey” van Heydoorn ta kontentu di por a duna guia na e trayekto
aki i ku pronto nos lo kuminsá mira resultadonan positivo na momentu ku kuminsá
ku renobashon di e skolnan.
—
Sr. Sithree ‘Cey’ van Heydoorn
Minister di Enseñansa, Siensia, Kultura i Deporte