AQUALECTRA TA HASI TRABOUNAN DI REPARASHON PROMÉ KU INSTALÁ METERNAN INTELIGENTE DEN ABRAHAMSZ I SAPATE
AQUALECTRA TA HASI TRABOUNAN DI REPARASHON PROMÉ KU INSTALÁ METERNAN INTELIGENTE DEN ABRAHAMSZ I SAPATE
Willemstad 24 di nòvember 2021- Aqualectra a inisiá ku trabounan di reparashon den área di Abrahamsz i Sapaté. E trabounan ta sigui despues di a inspekshoná e área rondó di e meternan na luna di òktober. Tur esaki ta den kuadro di proyekto Advanced Metering Infrastructure (AMI) kaminda ta introdusí meternan inteligente na Kòrsou. E trabounan di reparashon lo dura mas o ménos dos siman. E trabounan por kousa inkumbiniensha pa suministro di awa i/ òf koriente na kas di e habitante konserní. No tin gastu mará na e trabounan di reparashon pa kliente. Aqualectra ta pidi diskulpa na klientenan ku por eksperenshá algu di molèster debí na e trabounan di reparashon na instalashon di e adrès spesifiko.
Durante di e inspekshon ku a tuma luga den luna di Oktober a konstatá algun trabou di reparashon ku ta nesesario pa tuma lugá promé ku instalá e meternan inteligente di awa i koriente. Por pensa por ehèmpel riba kambio di pipa ku ta kousa lèkazje, kambio di kashi di fius i rekonstrukshon di lanta para. Na momentu ku kaba ku e trabounan di reparashon den área di Abrahamsz i Sapaté, Aqualectra lo sigui ku e siguiente fase ku ta remplaso di meternan inteligente den e barionan. Na mes momentu ku ta hasi e trabounan di reparashonnan, Aqualectra lo finalisá tambe trabounan pa kita meternan ku no ta den uso pa mas ku 12 luna.
E kliente ta sentral pa Aqualectra den e proseso i ehekushon di e meternan inteligente. A krea un struktura kaminda e kliente ta sinti ménos molèster posibel na momentu ku ta kambia su meternan di awa i koriente. Esaki a eksigí un temporada di bon preparashon promé ku hasi kambio di e meternan. Komo parti di e temporada di bon preparashon aki Aqualectra ta hasi promé un inventarisashon digital di meternan. Despues ta inspekshoná situashon rondó di e meternan. Lo hasi tur reparashon nesesario di antemano, pa asina finalmente pèrkurá ku e kambio di meter mes ta kana zetá i ku ménos molèster posibel den suministro di awa i koriente. E trabounan di reparashon ta keda hasí dor di kontratistanan lokal ku ta trahando duru huntu ku Aqualectra riba proyekto AMI.
Na momentu ku kuminsá kambia meter, Aqualectra lo komuniká kontinuamente, direktamente i na tempu ku klientenan. Aqualectra lo laga foyeto ku tur informashon i instrukshon nesesario den ‘brievenbus’ di kada kliente. Ta rekomendabel pa keda vigilá kontenido di e ‘brievenbus’ na kas ku regularidat pa keda bon informá. Tambe lo duna informashon via medionan general di komunikashon. Aqualectra ta gradisí su klientenan pa koperá pa asina huntu nos krea e ret di utilidat di futuro di Kòrsou.