Site icon KIKO TA PASANDO NOTISIA I INFORMASHON

GRAN FINAL LIGA MCB TERSER DIVISHON 2021! DJALUNA 13 DI DEZÈMBER 2021, 8’OR PM NA TERENO DI FFK!

Advertisements

 

 

GRAN FINAL LIGA MCB TERSER DIVISHON 2021!

DJALUNA 13 DI DEZÈMBER 2021, 8’OR PM NA TERENO DI FFK!

 

 

Despues ku Liga MCB Terser Divishon su buèlta di 4 a tèrminá djaweps último, e 2 ekiponan ku a klasifiká pa e gran final ta konosí. Fc Inter i C-Stars United lo enfrentá otro djaluna awor, 13 di dezèmber, pa 8’or di anochi na tereno di FFK durante e tremendo partido final aki.

 

E partido aki lo bai ta unu sumamente interesante mirando ku ta di 2 biaha ku e ekipo Fc Inter ta partisipá na un partido final den e divishon aki i ta promé biaha ku ekipo di C-Stars ta den e final di Liga MCB Terser Divishon.

Pues djaluna, 13 di dezèmber 2021, ta un tabla lo bula na tereno di FFK durante e gran final di Liga MCB Terser Divishon!

 

Un yamada ta bai na hinter e pueblo di Kòrsou pa asistí na e Gran Final di Liga MCB Terser Divishon. Bin presensiá si ta Fc Inter òf ta C-Stars United lo ta e ekipo kampion di Liga MCB Terser Divishon ku lo promové pa Liga MCB Segundo Divishon.

 

Tur fanátikonan por presensiá e partido final aki basta presentá ku un ID bálido (no di forma digital) i un QR Code pa por drenta stadion. Esaki nan ta obligatorio pa tur persona di 12 aña bai ariba. Entrada pa e partido final di Liga MCB terser Divishon ta kompletamente grátis! Bin pasa un ratu ameno den kompania di bo famia i disfrutá di bo deporte preferí, e deporte rei, futbòl!

 

MCB i FFK ta wardabo!

 

12 dezèmber 2021

 

 

Exit mobile version