Nos propio kuminda den 7-stap – agrikultura sostenibel, e luz na horizonte!

 

 

Nos propio kuminda den 7-stap – agrikultura sostenibel, e luz na horizonte!

 

 

Partido Inovashon Nashonal (PIN) a konstatá ku preis di kuminda ta keda subi bárbaramente. Produktonan ta bira menos den kantidat i kada bes ku menos posibilidat pa verifiká e kalidat di loke nos ta kome. Ta e momento oportuno pa duna balor na nos agrikultornan lokal i aumenta nos produkshon nashonal di bèrdura i bestia pa konsumo. Esei mester ta nos tur su resolushon pa 2022.

 

Duna balor na agrikultornan lokal

Pa hopi aña kaba nos agrikultornan ta produsí riba nan mes forsa i a desaroyá e sektor di agrikultura pa Kòrsou. Na 2017 gobièrnu di Kòrsou, eks-minister Suzy Römer, huntu ku e agrikultornan organisá den koperativa a start k’un trayekto pa desaroyá e sektor indespensabe aki pa sobrebibensia di hende. Lamentabelmente PIN ta konstatá ku no a siguí ku e trabounan. E apoyo gubernamental sin embargo ta nesesario pa desaroyo i organisashon di e sektor i lo trese hopi benefisio pa nos komunidat, manera entre otro kontinuidat, garantia  di sufisiente kantidat i kalidat di kuminda. Además e sektor por generá sentenares di kuponan di trabou. 

 

Plan di Produkshon Agrariko

Awor ta e ora pa demonstrá ku nos mes por. Nos mes por garantisá nos mes kuminda i stòp di depende di otronan. E konsekuensianan di e dependensia di otro kada dia ta mas bisto pa pueblo di Kòrsou, esta ku preisnan di bèrdura, fruta i karni a bira inpagabel. Ademas e produktonan no ta kontrolabel i ta afektá nos salú i nos saku. Pa kambia e rumbo aki nos tin ku introdusí un Plan di Produkshon Agrariko pa por ehekutá e maneho agrario. PIN ta konsiente ku e trayekto ta tuma su tempu, pero mester siguí pa di tal manera ku ta protehá esnan mas vulnerabel den nos komunidat. Huntu ku agrikultornan Gobièrnu mester kana siguiente pasonan.

 

1. Sinta ku e sektor agrario pa pone tur nanishi den mes direkshon i pa identifiká tur e nesesidatnan ku tin pa por kumplí ku e Plan di Produkshon Agrariko.
2. Garantisá pa medio di e sektor agrario, spesialmente e suplidornan tur loke mester ta disponibel pa garantisá ku e Plan di Produkshon Agrariko por keda ehekuta di forma eksitoso.
3. Skohé 6 berdura riba kua Kòrsou ta bai enfoká. 
4. Pa por skohé esakinan, ta importante pa tene na kuenta kua ta e bèrduranan ku ta produsí lokalmente ku mayor fasilidat i ku ta aportá na nutrishon sano di nos suidadanonan, basa riba e tabla di nutrishon krea pa nos propio nutrishonistanan di Minsterio di GMN.
5. Krea un skema di produkshon pa kada un di e produktonan i identifiká tur loke mester pa por produsí esakinan. Asina ta garantisá kontinuidat di produkshon saludabel.
6. Krea i fortalesé fasilidatnan entre otro, garantisá awa barata pa e produktornan. E proyekto aki ta kla pa implementá.
7. Yega na akuerdo ku entidatnan ku ta distribuí i tambe ku marshe, toko, minimerkado i supermerkadonan pa garantisá ku e produktonan ta bira aksesibel pa e konsumido na preisnan hustu i ku tambe e produktor por risib un preis hustu pa su produkto.

 

E Plan di Produkshon Agrariko aki ta sumamente nesesario pa nos por garantisá sufisiente kuminda saludabel pa nos komunidat. Huntu ta e uniko manera pa nos por logra esaki.