AQUALECTRA TA FORTIFIKÁ KUMPLIMENTU DI PAGO PA KORIENTE USÁ NETAMENTE PA GARANTISÁ SUMINISTRO DI UTILIDAT I INVERSHONNAN PA FUTURO

 

AQUALECTRA TA FORTIFIKÁ KUMPLIMENTU DI PAGO PA KORIENTE USÁ NETAMENTE PA GARANTISÁ SUMINISTRO DI UTILIDAT I INVERSHONNAN PA FUTURO

Willemstad 21 di desèmber  2021- Ta Aqualectra su responsabilidat pa perkurá ku komunidat ta keda garantisá di awa i koriente na un forma duradero.  Gran mayoria di nos komunidat ta kumpli i paga nan kuenta di awa i koriente promé ku e fecha stipulá riba e resibu.  Sinembargo e kantidat di debe riba kaya na Aqualectra a oumentá supstanshalmente, loke no ta responsabel.  No opstante ku Aqualectra ta hopi konsiente di e situashon sosio-ekonómiko, ta na su lugá pa atendé e debe aki na un forma responsabel pa e no peligrá suministro di awa i koriente i invershonnan ku netamente mester hasi pa garantisá un futuro duradero.  Aqualectra pa e motibu aki ta fasilitá e posibilidat pa hasi petishon pa un areglo di pago mas aksesibel pa esnan ku di bèrdat no por kumpli mesora ku Aqualectra.  Banda di esaki lo atendé esnan, ku no opstante tur esfuerso ku Aqualectra a hasi pa logra ku nan ta kumpli ku e debe ku nan tin na Aqualectra, di un òf otro forma ta burla di Aqualectra pero ta sigui usa koriente sin ta paga pa esaki.

Areglo di pago fásil riba Aqualectra.com

Ta un bon kustumber ku klientenan ta paga Aqualectra entre otro na un di e mas di 200 puntonan di pago di Pagomátiko of Pagafásil.  Tin hopi ku ta hasi nan pago tambe via di transferensha bankario.  No opstante tur e posibilidatnan pa por kumpli ku Aqualectra na tempu tòg por sosodé ku un kliente, debí na un òf otro sirkunstansha, no por kumpli mesora ku e pago na Aqualectra.  Awor por hasi un petishon pa un areglo di pago dor di djis subi Aqualectra.com i yena e formulario pa un petishon pa areglo di pago online.  Aqualectra mes ta tuma kontakto ku e kliente pa por konkretisá e areglo di pago.  No tin mester bin e sentro di kliente di Aqualectra mas pa sera un areglo di pago.

 

Deskonekshon ta un último opshon

Pa Aqualectra ta importante pa por sigui garantisá tur kliente ku awa i koriente.  Sinembargo den kaso ku un kliente, no opstante posibilidat ku ela keda ofresé, ta burla di Aqualectra su esfuersonan pa atendé ku debe atrasá, no ta sobra Aqualectra otro opshon di deskonektá e koriente.  Esaki ta nifika ku lo por yega hasta na e punto ku ta eliminá e konekshon.

Por spera akshon un tiki mas dirigí pa atendé ku esnan ku no ke kumpli ku Aqualectra, no opstante tur fasilidat ofresé i esfuerso hasí.  Aqualectra lo rekonektá e kliente asina ku e kliente kumpli i hasi pago kompletu di e montante ku e debe, plus e kosto di rekonekshon, den e kaso ku a hasi pago di e montante kompletu na un di e 200 puntonan di pago di Pagafásil i Pagomátiko promé ku 5’or.