Investigashon forense ta konkluí: Integridat di sistema di pago no a keda afektá

December 21, 2021 REDAKSHON

Investigashon forense ta konkluí:
Integridat di sistema di pago no a keda afektá

WILLEMSTAD/PHILIPSBURG – Resientemente, Centrale Bank van Curaçao en Sint Maarten (CBCS)
a risibí e informe definitivo riba e investigashon forense realisá tokante e atake sibernétiko kometí
kontra su sistemanan di IT. E informe ta indiká ku integridat di su sistema di pago no a ser afektá.
Ademas, e atake no tabatin konsekuensia pa e sistemanan di informashon di e institutonan finansiero
ku Banko ta supervisá. Fuera di esei, CBCS ta sigui disponé di tur su datonan.
Djaweps 2 di sèptèmber 2021, Interpol a avisá CBCS tokante un posibel atake sibernétiko kontra su
sistemanan di IT. Mesora a instalá un tim pa maneho di insidente (IRT) i a inisiá un investigashon
forense, dunando prioridat na protekshon di e integridat di CBCS su sistema di pago. For di den e
análisis inisial, a konstatá ku siguridat di CBCS su sistema di pago no a keda afektá i awor esei a keda
konfirmá.
Inmediatamente despues di a risibí e aviso di Interpol, e tim di eksperto, formá pa e tim di ICT di
CBCS i diferente eksperto lokal i internashonal, a tuma medida pa pone e datonan i e ret di CBCS bèk
fuera di peliger. Durante e investigashon, a topa evidensia di e infiltrashon riba CBCS su ret
korporativo. Danki na e intervenshon efikas di e tim di eksperto, por a sanea e ret korporativo i a
frustra e atake. Pa motibu di siguridat, CBCS no ta komentá riba kontenido di e medidanan di siguridat
(IT) i di prevenshon di daño ku e ta tuma.
E hackernan a logra penetrá CBCS su ret apesar ku Banko su sistema di siguridat informátiko ta diseñá
siguiendo e mihó práktikanan internashonal i ku konstantemente ta sigui hasi invershon den e área
akí. ‘E tipo di suseso akí ta pone bo para ketu i ta importante pa siña for di loke a pasa. Na promé
lugá, nos mes mester siña afó, pero pa otro instansianan tambe e por sirbi komo un realisashon
importante. P’e motibu ei mes, a tene vários interkambio ku e departamentonan di Information Risk
di diferente instituto finansiero lokal pa asina kompartí nos eksperensia’, asina Presidente di CBCS,
Sr. Richard Doornbosch, a bisa.
CBCS tabata den kontakto ku e institutonan finansiero i demas partinan interesá na diferente
momento i ta sigui tene nan na altura di e desaroyonan relevante. E ministernan di Finansa di e dos
paisnan tambe a ser tené na altura, ku konfidensialidat estrikto, tokante desaroyo di e insidente i e
resultadonan di e investigashon forense.
CBCS ta konsiderá ku su medidanan di siguridat informátiko ta un asuntu interno i lo no komuniká
mas al respekto den medionan di komunikashon.
Willemstad, 7 di desèmber 2021
CENTRALE BANK VAN CURAÇAO EN SINT MAARTEN