PARLAMENTARIO: Gilbert Doran

Korte den promé instante a ordená minister Charles Cooper (VVRP) awe, pa publiká diferente dokumento relashoná ku e 33 mion ku InselAir a risibí di gobièrnu promé ku el a bati bankarota. Den pasado e èks minister di VVRP Zita Leito a nenga di publiká e dokumentonan.

Durante e kaso wes a tuma nota ku algun siudadano, di kua un reportero, for di tres aña pasá a inisiá un proseso pa yega na un enkuesta sivíl. Pa por hasi esaki nan tabatin mester di tur informashon. E enkuesta sivíl lo mester konkluí ken ta esnan ku a probechá di e 33 mion.

Wes a komprondé tambe durante e kaso ku na diferente okashon èks minister di ekonomia Steve Martina a splika ku si no duna InselAir e 33 mion, e kompania lo bati bankarota i e konsekuensianan lo ta tres bia mas tantu ku e 33 mion debí na falta di konektividat aéreo. Martina nunka no a kuantifiká e pèrdidá di tres bia 33 mion. Pues nunka e no a splika kon el a yega na e konklushon ei.

Wes a haña di komprondé durante e kaso ku InselAir tabatin seis diferente BV. Den nan tabatin por ehèmpel un ku tabata doño di e avionnan i un otro ku tabata lease e avionannan for di e otro. E BV ku tabata lease e avionnan tabatin un debe astronómiko serka e BV doño di e avionnan.

Ora InselAir a risibí e 33 mion, un di e promé debenan ku nan a paga tabata esun di lease. A resultá ku e mesun hendenan ku tabata manehá esun BV, tabata manehá e otro BV tambe. Pues nan mes a paga nan mes promé ku nan a paga e trahadónan.

InselAir tabata un negoshi di algun komersiante, meskos ku kualke otro negoshi, i no un kompania di gobièrnu. Tòg gobièrnu a hinka plaka di pueblo den dje.

Wes den su veredikto a splika ekstensamente kon el a yega na su desishon.