Charetti America – Francisca  𝗥𝗘𝗟𝗔𝗧𝗢 𝟮𝟬𝟮𝟭

Mi no por reflekshoná riba aña 2021, sin para ketu riba mi presensia i kontribushon den polítika na Kòrsou.

Polítika manera semper mi a bisa ta un vehíkulo pa trese bienestar pa un pueblo, i no un lift pa bo propio bienestar.

Si bo studia e palabra “ Polítika “ na griego e ta konsistí di e palabra ;

1. Polis – Siudat òf kaminda hende ta biba.

2. I e abilidat pa atendé ku tema nan ku ta afektá tur hende.

Komo un polítiko esaki ta nifiká, ku nos tur mester ta interesá den mehorá e kalidat di bida di tur hende.

Pa por logra esaki, nos tin ku saka tempu pa studia e nesesidatnan i tema nan di interes komun. E ta bira difísil pa trata algu ku bo no a analisá òf diagnostiká. Pa ami den praktiká esaki a nifiká ku mi mester a trein mi mes pa skucha mihó. Ménos lihé pa papia i mas lihé pa skucha. Asta den esnan ku ta pensa otro for di mi, mi ta skucha solushon pa e problema nan ku ta afektá nos tur.

Polítika ta un siensia, e ta rekerí pa nos kada unu studia.

* Studia loke ta pasa rondó di nos.

* Studia e orígen di situashon nan.

* Studia e historia di esnan ku nos ke yuda.

Naturalmente ta importante pa nos komo polítiko keda na altura di e tema nan aktual tambe, pero no via di media so, literatura tambe tin su lugá.

Kolumna òf paginá di opinion ta parti di esaki, pero e no por ta bo úniko fuente di informashon. E peliger di esaki ta ku si nos no paga tinu, henter nos narativa òf e tema nan ku nos ta atendé, ta wòrdu kontrolá pa e opinion di un periodista òf e agènda di esun ku ke tene nos okupá. Esaki ta netamente loke ku nos ta eksperensiando hopi aktualmente.

Polítika ta un siensia paso e ta imposibel guia otro nan kaminda bo mes no a bai. E ta un siensia paso sin konosementu e pueblo ta bai pèrdí.

Komo polítiko e mester ta nos meta prinsipal pa krese dor di amplia nos konosementu. Nos tur mester por sinti nos orguyoso ora un di nos koleganan ta kompartí su opinion riba un tema.

Nos tur mester por siña algu di otro òf bira mas sabí ora un di nos ta hiba palabra. Ta pesei nos mester elevá. Pa kada biaha ku nos habri nos boka, nos elevá esun ku ta skucha.

Ta hende elevá so por elevá otro nan.

Konosementu no ta algu reservá pa esun ku mas skol òf mas moda.

Konosementu ta e arma di esun pober pa sali for di pobresa.

E ta eskudo di esun mas debil kontra tur tipo di opreshon.

Promé ku ami a drenta polítika mi kasa tabata lesa korant, awor aki di baina e ta haña e korant pa mira. Mi kasa tabata lesa buki, awor aki mi ta lesa mas buki ku ne. Paso mi mester ta bon informá. I mi mester studia pa proba mi mes.

E hamber pa konosementu aki mester ta loke ta karakterisá nos parlamento.

Ora bo ta persiguí konosementu niun posishon no ta intimidá bo. Ora bo ta buska konosementu bo ta krese. I esaki ta loke mi ta konsehá algun di mi koleganan tambe pa hasi konstantemente.

Esei ta loke nos debe tur esnan ku a konfia nos komo polítiko ; KRESEMENTU i MADURES

Nos mester krese i madurá pafó i paden.

Nos por krese den voto – Ban krese den konosementu.

Nos por krese den influensia – Ban krese den respetá otro.

Nos por krese den outoridat – Ban krese den humildat.

Ban madurá !!

Ata un otro palabra ei : HUMILDAT

E ta sorprendé mi kuantu hende ta pensa ku humildat ta ora bo a lanta den pobresa òf ora bo bin for di nada.

Mi a mira hopi hende pober super orguyoso. Hende ku no tin nada pero ta muchu orguyoso pa aseptá yudansa. Hende sin konosementu ku no ke aseptá ku nan no sa, i no ta buska konseho.

Humildat ta bria den bo manera di rekonosé bo erornan.

Humildat ta bria den bo manera di trata otro hende.

Humildat ta na su tòp ora bo tuma konseho òf buska yudansa.

Humildat ta nos manera di balansá poder komo algu relativo, awe bo tei mañan bo no tei.

Promé ku mi a asumí presidensia di parlamento mi tabatin apénas shete luna di eksperensia ku parlamento.

Mi tabata sa kon parlamento ta wòrdu mira.

Un órgano ku no tabata gosa di rèspèt di e pueblo. Un instituto sin honor.

Esei a motivá mi pa asumí e funshon, i pa trese honor bek riba Parlamento komo un órgano ku ta legislá i kontrolá.

Permití mi duna un bista di e estado ku Parlamento tabata aden ora mi a asumí presidensia.

8 luna pasa kasi tur persona ku mi kòmbersá ku ne no tabata tin un bista positivo riba parlamento. Nan tabata komentá ku parlamentarionan ta un bèrgwensa pa pueblo, ku nan ta wak nan mes interes, i ta hasi e órgano ei un sirko òf un teatro di Komedia.

Nos ta 8 luna despues, tin espasio pa mehorá ?

Mi por bisa ku segun mi ta kòmbersá ku mes un personanan bek, nan ta bisa di ta mira kambio den e manera di proseder di e parlamento. Tin ménos tiramentu di palabra, tin un seriedat den e manera di atendé ku otro, tin un seriedat pa ku reunionnan.

Mayoria di nos parlamentario nan a partisipá na tur tur reunion sin falta niun.

Nos mester traha riba e yegamentu trempan si pero e partisipashon ta tremendo.

Mi ke aploudí e parlamentario nan tambe ku unda ku bo bira bo ta tende ku nan ta hopi kolegial ku nan mes koleganan di partido i miembronan di otro frakshon.

Koleganan mi ta hopi orguyoso di boso.

Na Mei 2021 ora mi a asumí e responsabilidat di presidente di parlamento, mi a haña

– [ ] 62 Lei pendiente pa atendé

– [ ] 41 reunion públiko ku a keda pendiente pa wòrdu yama

– [ ] 30 reunion di komishon sentral ku a keda pendiente pa wòrdu yama

Di Mei pa Novèmber mi a yama ;

25 reunion di komishon sentral,

36 reunion públiko,

tambe nos a trata 9 lei.

Na e momento aki nos tin

13 reunion di komishon sentral pendiente

9 reunion públiko pendiente

Nos ta tuma nos responsabilidat na serio i ta konsiderá tur reunion pidi importante sin importá ku ta koalishon òf oposishon, paso nos ta un parlamento.

E manera ku nos ta trata nos kolegionan haltu di estado tambe ta riba mi agènda.

Komo Presidente mi ta traha riba nos relashon ku kada un di e órgano nan aki ;

Hunta di Konseho – Konseho Supremo – Kontrolaria General – Ombudsman

Banda di e kolegio nan aki nos relashon ku órganonan manera Korte di Hustisia – Konseho Supremo Elektoral i Gobièrnu tambe ta manera mester ta.

Mi tin fe ku nos lo logra, mi tin fe ku nos lo uni. Paso ta uni so nos lo logra.

Dios bendishoná Kòrsou.

Nos ta un, nos ta Kòrsou

#𝗘𝗞𝗮𝗺𝗶𝗻𝗱𝗮𝗧𝗮𝗟𝗮𝗿𝗴𝘂 #𝗡𝗼𝘀𝗧𝗮𝗬𝗲𝗴𝗮𝗦𝗶 #𝗡𝗼𝘀𝗧𝗮𝟮𝟭