Presidente di Parlamento Charetti America – Francisca Rᴇʟᴀᴛᴏ ᴅɪ ᴇ sɪᴍᴀɴ ²⁴

 

Presidente di Parlamento Charetti America – Francisca

Rᴇʟᴀᴛᴏ ᴅɪ ᴇ sɪᴍᴀɴ ²⁴
Bon Siman !
Nos a kuminsá ku un aña nobo, i awe ta final di reseso di parlamento.
Awe nos ta kuminsá bek ku nos reunionnan pa públiko.
𝗥𝗲𝘂𝗻𝗶𝗼𝗻𝗻𝗮𝗻 𝗩𝗶𝗿𝘁𝘂𝗮𝗹
Nos reunion di awe ta un reunion di komishon sentral ku Minister di Hustisia, direktor i tim di maneho di SDKK Sentro di Detenshon i Korekshon Kòrsou
Mirando e situashon di e pandemia na Kòrsou, nos reunionnan lo ta virtual. Ku otro palabra, e parlamentarionan lo no reuní den sala pero nan lo ta sea den nan kantor òf un kaminda trankil ku nan por partisipá aktivamente na e reunion.
𝗠𝗶 𝗲𝗸𝘀𝗽𝗲𝗿𝗲𝗻𝘀𝗶𝗮 𝗸𝗼𝗺𝗼 𝗣𝗿𝗲𝘀𝗶𝗱𝗲𝗻𝘁𝗲
E aña ku a pasa for di Mei te ku Dezèmber 2021, mi por a eksperensie komo un aña positivo pa ku e funshonamentu di parlamentarionan den sala di reunion i mi no tin duda ku aña 2022 tambe lo bai bon.
Komo parlamento nos tabata tin 25 reunion di komishon sentral, 36 Reunion Públiko i nos a trata 9 lei.
Tur e reunionnan aki tabata reunionnan ku kontenido.
𝗠𝗼𝘀𝗵𝗼𝗻𝗻𝗮𝗻
Mi ta hopi kontentu di bisa ku mi deseo pa nos Elevá, Madurá i Laga lòs, tiki tiki pero sigur ta wòrdu ripití i pone den praktiká bou di algun di mi koleganan.
Esaki bo por mira den mayoria moshon ku a wòrdu presentá den parlamento.
Den pasado mayoria bia, oposishon o koalishon ta traha nan moshonnan sin konsulta ku otro, pero den e temporada aki mi por a eksperensia kon oposishon i koalishon ta sinta huntu pa formulá moshonnan, i e moshonnan aki tabata pasa “Wall to Wall” Esaki sigur ta algu di elogiá.
𝗔𝘀𝗶𝘀𝘁𝗲𝗻𝘀𝗶𝗮 𝗻𝗮 𝗿𝗲𝘂𝗻𝗶𝗼𝗻𝗻𝗮𝗻 𝗶 𝗸𝗼𝗹𝗲𝗴𝗶𝗮𝗹𝗶𝗱𝗮𝘁
Hopi biaha bo ta tende ku ta paga parlamentarionan, pero nan no ta asistí na nan boka di trabou, nan no ta partisipá na reunionnan. Mi tin ku bisa ku mayoria parlamentario a partisipá na tur e reunionnan ku tabata tin for di Mei te ku Dezèmber.
E parti di kolegialidat bou di koleganan tabata tremendo, atrobe sin importá koalishon òf oposishon, si un kolega tin mester di yudansa den algu, yudansa ta sali di tur dos banda.
𝗠𝗲𝘁𝗮 𝟮𝟬𝟮𝟮
Ayera mi a kompartí parti di mi meta pa 2022. Bo por lesa esaki den mi relato di 2021 dor di klik akinan https://www.facebook.com/1551874111805133/posts/3172233146435880/
Hopi biaha e parlamentario ta wòrdu de-humanisa riba medio nan sosial. Frustrashon nan ku hopi biaha no a wòrdu okashoná dor di dje òf tin biaha e no tin kontrol mes riba dje, ta wòrdu kanalisá dor di kritiká, buly i papia kon ku ta di dje.
Tin hende ta asta sugerí ku esaki ta normal den polítika, i ku si bo no por ku kayente bo tin ku sali for di kushina.
Parlamento ta un kushina kaminda kuminda pa e pueblo ta wòrdu prepará, ta pesei nos no por permití venenu ni falta di higiena penetrá den nos área di trabou.
Un di mi metanan pa 2022 ta pa sigui pone honor riba e órgano prestigioso parlamento, dor di selebrá tur loke ta bon di nos instituto.
Mi ke invitá bo tambe pa hasi esaki dor di no pone dede solamente riba e kosnan ménos bon ku un persona ta hasi, pero selebrá su mihó dia nan tambe.
Selebrá otro ta na moda den 2022.
Komo parlamento nos ta tuma nos responsabilidat na serio i ta konsiderá e echo ku nos por sirbi nos pueblo un honor.
Pesei den aña 2022 nos komo e órgano di mas haltu di Pais Kòrsou lo sòru di representá abo dignamente. Nos lo sigui elevá pa ta e bos ku ta sali pa bo.
Sin importá koalishon òf oposishon, nos lo sigui uni di paden bin pafo ku plannan konkreto pa salvaguardá nos dushi isla.
Ta huntu so nos por ta e refleho di henter nos komunidat.
Bo por konta ku nos i sinti nos den 2022 – ora ta trata interes di nos pais Kòrsou.
Den 2022 nos lo sigui vigilá e maneho di gobièrnu – ora ta trata bo salu i bienestar di bo famia.
Nos lo hasi pleno uso di nos outoridat pa garantisá – bo outonomia i dignidat.
Nos lo sigui buska kooperashon i unidat riba tur tereno – ku ta salbaguardiá bo futuro.
𝗗𝗮𝗺𝗮𝗻𝗮𝗻 𝗱𝗲𝗻 𝗣𝗮𝗿𝗹𝗮𝗺𝗲𝗻𝘁𝗼
Mi tin Fe ku nos lo uni aun mas – mi tin fe ku nos lo logra.
Esaki spesialmente pa mi koleganan femenino den parlamento. Ban uni mas, muhénan fuerte ta empoderá otro i no ta kibra otro. Ora nos komo hende muhénan uni pa kosnan positivo, kosnan grandi lo sosodé.
𝗦𝗸𝘂𝗰𝗵𝗮 𝗻𝗼𝘀 𝗿𝗲𝘂𝗻𝗶𝗼𝗻𝗻𝗮𝗻 𝘃𝗶𝗮 𝗿𝗮𝗱𝗶𝗼 𝗗𝗶𝗿𝗲𝗰𝘁 𝗟𝗶𝗳𝗲 𝟵𝟮.𝟭𝗙𝗠.
𝗕𝗼 𝗽𝗼𝗿 𝘄𝗮𝗸 𝗲 𝗿𝗲𝘂𝗻𝗶𝗼𝗻𝗻𝗮𝗻 𝘁𝗮𝗺𝗯𝗲 𝗟𝗜𝗩𝗘 𝘃𝗶𝗮 𝗱𝗶 𝗻𝗼𝘀 𝗙𝗮𝗰𝗲𝗯𝗼𝗼𝗸 𝗽𝗮𝗴𝗲 𝗽𝗮𝗿𝗹𝗮𝗺𝗲𝗻𝘁𝗼 𝗱𝗶 𝗞𝗼̀𝗿𝘀𝗼𝘂 𝗼̀𝗳 𝘃𝗶𝗮 𝗻𝗼𝘀 𝘄𝗲̀𝗯𝘀𝗶𝘁𝗲 𝘄𝘄𝘄.𝗽𝗮𝗿𝗹𝗮𝗺𝗲𝗻𝘁𝗼.𝗰𝘄
Na abo ku ta komparti mi relato tambe riba bo plataforma, DANKI
Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: