Miembronan di direktiva di Kámara Komèrsio i Industria di Kòrsou  a skohe presidente i vise presidente Billy Jonckheer i Ralph Ottenheim skohe unánimemente komo presidente i vise presidente pa aña 2022

 

Miembronan di direktiva di Kámara Komèrsio i Industria di Kòrsou  a skohe presidente i vise presidente

 

Billy Jonckheer i Ralph Ottenheim skohe unánimemente komo presidente i vise presidente pa aña 2022

 

WILLEMSTAD – Segun reglanan vigente tur aña Kámara di Komersio i Industria mester skohe durante di su promé reunion di aña un presidente i un vise presidente pa e periodo di un aña.

Durante di su promé reunion di djamars 11 di yanüari 2022, Kámara di Komersio i Industria di Kòrsou unánimemente a vota i a skohe sr. Willem (Billy) Jonckheer i Ralph Ottenheim komo respektivamente presidente i vise presidente pa aña 2022.

Presidensia i vise presidensia di Kámara di Komersio ta rekerí ku esakinan huntu ku e shete otro miembronan, kendenan tur ta eligí komo representantenan di interes general di komersio i industria, tin disponibilidat, tempu i konosementu pa atendé ku un área basta amplio di temanan ku ta afektá interes general di komersio. Klima di hasi negoshi, fiskalidat, reglanan di kompetensia, demanda interno i eksterno pa servisio i produktonan di merkado, promoshon di invershon den nos pais, pero tambe merkado di labor i kosto di hasi negoshi ta temanan ku ta rekerí atenshon i tempu pa atendé. Tur esakinan e direktiva tin komo tarea den representashon di e interes general di sektor empresarial i interes di e mas ku 26.000 empresanan registrá. Importantísimo i sentral den e representashon di interes general di komersio i industria ta temanan desaroyo ekonómiko i sosioekonómiko balansa di Pais i di suidadania. 

 

Pa loke ta trata e elekshonnan di tur aña, i manera ta regla, tur aña tres di e nuebe miembronan di Kámara di Komersio ta baha, segun skema. Esei ta trese kuné ku e temporada aki tambe, bou di ouspisio di un Komishon di Elekshon 2021-2022, ta teniendo elekshon pa eligí e tres miembro di direktiva. 

Anteriormente na komienso di e proseso di elekshon na luna di novèmber 2021 dos miembro di direktiva, kendenan ta sr. Marcos Cova i Arthur Rosaria, a keda eligí pa medio di nan kandidatura den representashon di empresa grandi. Elekshon pa medio di kandidatura ta tuma lugá na momento ku no tin mas kandidato ku tin funshon vakante. Pa e dos funshonnan vakante tabatin e dos kandidatonan menshoná, kendenan pues a keda eligí.

 

ELEKSHON DIA 17 DI YANUARI POSTPONE

Segun prosedura, djamars 17 di yanüari próksimo, tin plania pa tene votashon pa elekshon di un miembro mas di direktiva den representashon di empresa chikí, bou di ouspisio di un Komishon di Elekshon independiente. Pa un vakatura tin dos kandidatonan, kual ta kousa ku mester tene un votashon. E kandidatonan ta sra. M.M.C. Pandt i sr. O.P.S. de Souza. 

 

Pa esaki votadónan ya a risibí un yamada por eskrito ku nan por bin vota riba e dia ei. 

Desafortunadamente e desaroyonan relashoná ku COVID-19 ta hasi un votashon kompliká i riesgoso pa partisipantenan pa loke ta trata posibilidat di kontagio, kual ta kousa ku nos mester evaluá alternativanan. Mas lat e siman aki lo anunsiá den medionan di komunikashon kon lo sigui ku e proseso aki; un fecha mas lat ku ta tene kuenta ku desaroyo di e pandemia ta forma parti di e evaluashonnan.

 

Te ku awor Kámara di Komersio i Industria di Kòrsou lo ta konsistí di sra. Jeanette Hooi-Bonet i srs. Raoul Behr, Marcos Cova, Marco Cheis, Walid El-Hage, Willem (Billy) Jonckheer, Ralph Ottenheim i Arthur Rosaria.

 

Pietermaai, 12 di yanüari 2022