PROMÉ MINISTER GILMAR PISAS A REUNÍ KU Sr. MICHAEL RÖMER DI INTERPOL

 

PROMÉ MINISTER GILMAR PISAS A REUNÍ KU Sr. MICHAEL RÖMER DI INTERPOL

 

Willemstad – Promé Minister Gilmar Pisas a reuní ku sr. Michaël Römer ku ta stashoná na e Sede Prinsipal di Sekretariado General di INTERPOL na Fransia.

 

Durante di e reunion sr. Römer a duna splikashon riba su kontribushon na e esfuersonan stratégikamente i operashonalmente relevante i tambe importante pa intensivá koperashon polisial i hudisial den region di Americas en general i su partisipashon na diferente inisiativanan pa fortalesé lasonan di koperashon ku partnernan den e lucha kontra krimennan transnashonal ku ta un menasa pa Region di Americas. E la splika alabes kon e organisashon di INTERPOL ta brinda apoyo stratégiko, táktiko i operashonal pa yuda/fasilitá paisnan miembro i kon den e kuadro aki partikularmente Kòrsou por risibi apoyo.

 

Tambe sr. Römer a informá Promé Minister ku Kòrsou ta paga un suma pa ta miembro di INTERPOL. Den kuadro di esaki e la reiterá e importansia pa Gobièrnu di Kòrsou, pa medio di su servisionan konserní, laga tuma e pasonan nesesario pa inventarisá kua ta e benefisionan ku Kòrsou tin komo pais miembro di INTERPOL. E ta indiká tambe pa wak tur e áreanan ku Kòrsou por haña yudansa: sea ku ta pa apoyo stratégiko, táktiko, operashonal,  tambe kolaborashon i òf aliansa (partnership) na nivel global òf regional. Esaki ta konta igualmente pa ku e parti di asistensia den kuadro di desaroyo di kapasidat i entrenamentu. E parti di interkambio di best practices i interkambio di ekspertisio hurídiko i konosimentu di desaroyonan pa loke ta trata inisiativanan inovativo di karakter teknológiko pa asistí den e lucha kontra di kombatimentu di kriminalidat en general i di esnan di karakter transnashonal en partikular. 

 

Referiendo na diferente área di krimen transnashonal di karakter emergente, a referí spesifikamente na INTERPOL su kapasidat na brinda apoyo den kasonan di “high impact” manera atakenan cibernétiko, kaminda ku INTERPOL tin hopi ekspertisio den yuda paisnan miembro fortalesé nan resilensia Cybernétiko (Cyber Security). Igualmente tin e posibilidat ku INTERPOL ta brinda apoyo den esfuersonan den e lucha kontra entre otro terorísmo, labamentu di plaka, tráfiko di droga, arma di kandela i propiedat intelektual.

 

Adishionalmente Sr. Römer a indiká tambe ku ta bon pa konsiderá intensivá formanan di koperashon di diferente ministerio kaminda INTERPOL, por medio di su ‘National Central Bureau’, tin mas partisipashon den sierto komishonnan interministerial, pa ora ku ta atendé ku asuntunan di karakter internashonal, por tin un bista mas amplio di informashon ku por haña serka INTERPOL.

 

Sr. Römer ta rekomendá Promé Minister, pa komo Minister di Hustisia konsiderá pa hasi un bishita ofisial na e sede prinsipal di INTERPOL na Fransia, pa asina haña mas informashon pa ku kon INTERPOL por benefisiá Kòrsou i na mes momentu estrechá e lasonan nesesario ku e organisashon internashonal aki.

 

Promé Minister tabata hopi satisfecho ku e informashon ku e la risibí i ke dediká mas tempu pa sa kiko INTERPOL por nifiká realmente pa Kòrsou.

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: