Minister Dangui Oduber a reuni cu Fundacion Contra Cancer di Prostaat

Minister Dangui Oduber a reuni cu Fundacion Contra Cancer di Prostaat

ORANJESTAD – Diamars merdia Minister di Salud Publico Sr. Dangui Oduber a reuni cu e president di Fundacion Contra Cancer di Prostaat (FCCP) Sr. Milo Croes conhuntamente cu demas miembro di e bestuur. E reunion aki a bay den hopi bon esfera caminda e fundacion a comparti hopi informacion valioso cu por yuda riba e topico delicado cu ta cancer di prostaat. Minister Oduber su maneho ta basa riba cuido preventivo y esaki ta netamente locual FCCP ta ofreciendo na nos comunidad.

Cancer di prostaat ta di tres cancer cu mastanto ta keda constata aki na Aruba, por lo general 90 porciento di tur cancer ta curabel si esaki keda detecta na tempo. FCCP ta un fundacion cu a keda funda na aña 2012 pa Sr. Rudy Rodriguez Q.E.P.D., e mensahe cu e la laga atras ta: Ami tawata laat, wak pa abo no ta laat. E meta di FCCP ta pa conscientisa e comunidad masculino di Aruba cu ta riba 40 aña di edad riba e importancia pa haci bo check up pa cancer di prostaat anualmente. Tambe nan ta duna sosten necesario na esnan cu ta batayando contra cancer di prostaat.

Minister Dangui Oduber a gradici cada un di e miembronan pa e trabou buluntario cu nan ta haci, nan ta yuda den e parti di concsientisacion y duna sosten moral na esnan cu ta pasando den cancer di prostaat y nan famia. “Na final di dia e meta ta pa baha e cifra di mortalidad, percura pa nos por scapa mas bida cu ta posibel y esaki sigur ta un bunita iniciativa di e FCCP pa yuda vooral e ser masculino cu hopi biaha ta deha pa su salud” tabata exprecion di Minister Oduber. 

Minister Dangui Oduber ta kere den e trabou cu FCCP ta haciendo y lo duna nan su sosten pa nan por logra nan metanan, cu ta yuda trece conscientisacion riba cancer di prostaat pa esaki por wordo detecta na tempo.