Yoramentu so no ta baha preis! Parlamento i minister debe pueblo algun kontesta

 

Yoramentu so no ta baha preis!

Parlamento i minister debe pueblo algun kontesta

 

Willemstad — Djaweps awó komishon sentral lo deliberá ku minister di ekonomia i Fundashon pa Konsumidó riba preisnan ekstremadamente haltu manera e konvokashon dje reunion ta bisa. Pa PIN ta inkomprensibel ku un koalishon ku ta prediká ‘bùrt pa pueblo’, foi dia e ta na poder a papia hopi pero hasi nada tokante oumento di preis di komestibel en partikular. E ta inkomprensibel paso den un komunikado di foi dia 8 di desèmber 2021 PIN a kòrda gobièrnu ku e tin algun hèrmènt klave di alivio den su mes man.

 

Pregunta i akshon

Partido PIN no ta kere ku pueblo por soportá òf ta meresé mas deliberashon sin akshon konkreto. Tambe PIN ke evitá a todo kosto ku pais ta drenta den mas káos pa kulpa di un koalishonku ta perdiendo legitimidat paso e no ta atende asuntunan ku ta afektá e bida di tur dia dje hòmber i muhé trahadó.

P’esei Partido Inovashon Nashonal ta pidi tur representante di pueblo pa buska kontesta kla riba minimal e siguiente 3 preguntanan:

• Minister di finansas ta dispuesto pa redusí òf eliminá derecho di importashon i OB riba sikiera e flete di produktonan di kuminda? Gobièrnu i parlamento mester sa ku gastu di flete a subi ku algun shen porshento. Esaki ta afektá preis na dos manera paso ta kobra impuesto riba flete tambe. Aki nan fásilmente gobièrnu por dominá preis redusiendo òf eliminando e komponente ei for dje kalkulashon di impuesto. 

• Kiko konkreto gobièrnu Pisas i partikularmente minister di GMN a hasi kaba pa oumentá produkshon lokal di kuminda? PIN ta kere ku awor si komunidat mester sa si porfin a firma e dekreto pa agrikultornan haña awa barata di Aqualectra. Esaki ta importante paso mas produkshon lokal ta eskivá e komponente di flete i derecho di importashon den e preis na kaha. Dado kaso mes ku e produkto di nos mes tera tin mes preis ku esun importá, sikiera e plaka ta bai den saku dje agrikultor lokal.

• Minister di ekonomia lo duna Fundashon pa Konsumidó mas sosten konkreto den aña 2022 i despues? Ku investigashon komparativo konstante i amplio, un fundashon pa konsumidó ta yuda kontené oumento di preis. Partido PIN ta konvensí ku komo un fundashon di komunidat i pa komunidat, nos Fundashon pa Konsumidó mester haña e sosten konkreto pa hunga un ròl mas importante den esfuersonan pa informá i konsehá e konsumidó.

 

Pa dilanti

Komunidat ta bou di un preshon enorme. P’esei pa Partido PIN deliberashon den bashí, sin meta òf sin direkshon konkreto no ta akseptabel mas.

Di koalishon ainda no a tende nada paresido na pasonan realístiko a término korto pa protegé pueblo kontra oumento ekstremo di preis. P’esei, pa orientashon i pa sende e lus na horizonte, dirigentenan di nos pais lo hasi bon di tene lanta n’e preguntanan aki riba.