BRANTWER KÒRSOU TA ATVERTÍ PA KOMPANIANAN KLANDESTINO KU TA HASI MANTENSHON DI APARATO DI PAGA KANDELA

WILLEMSTAD – Resientemente durante kontrolnan regular ku Departamentu di Prevenshon di Brantwer Kòrsou ta ehersé, e personal a konstatá na un establesimentu ku tin aparato pa paga kandela (brandblussers) di kompanianan ku no ta ser rekonosé dor di Brantwer Kòrsou. E kompanianan akí ta bishitá negoshinan sin un lisensia bálido i di forma klandestino ta ofresé pa hasi mantenshon na e aparato di paga kandela na un preis ekonómiko. A yega di sosodé ku e kompanianan klandestino akí a djis yena e aparato di paga kandela ku awa i tambe tabatin okashonnan kaminda a tuma un montante di plaka serka e doño di e negoshi en kuestion pero a laga e aparato di paga kandela bashí. Brantwer Kòrsou  a konstatá tambe ku ta purba na manipulá e steker di kòntròl na e aparato.

Den pasado Brantwer ya a sinta ku algun persona/kompania riba e tópiko i a splika nan e importansia di tin un lisensia bálido pa por duna e tipo di servisionan akí na komunidat. Tambe a indiká na e persona/kompanianan akí na vários okashon, ku nan no tin mag di kontinuá ku e tipo di práktika nan aki. Aparte di e palabrashonnan ku a keda hasí durante e kombersashon, Brantwer Kòrsou a notifiká e persona/kompanianan akí tambe ofisialmente pa medio di un karta ku nan no mag kontinuá ku e trabou nan en kuestion.

Sinembargo, Brantwer a tuma nota durante di kontrolnan resientemente ku e práktikanan akí a kontinuá i lo no duda pa atendé atrabes di pasonan legal si sigui tuma nota di e mesun kompanianan akí ku ta sigui ehersé aktonan sin aprobashon. Brantwer Kòrsou ta enfatisá na públiko, ku solamente e kompania nan Catis NV, Safety and Fire Equipment BV/Agnesi i Linda Gas tin e aprobashon aktualmente pa hasi mantenshon i reparashon  na aparatonan di paga kandela.