DELEGASHON DI GOBIÈRNU DI KÒRSOU A YEGA DUBAI Gobièrnu di Kòrsou su delegashon, liderá pa Promé Minister Gilmar Pisas huntu ku Minister di Desaroyo Ekonómiko Ruisandro Cijntje a yega Dubai dia 26 di mart 2022.

DELEGASHON DI GOBIÈRNU DI KÒRSOU A YEGA DUBAI

 

Willemstad – Gobièrnu di Kòrsou su delegashon, liderá pa Promé Minister Gilmar Pisas huntu ku Minister di Desaroyo Ekonómiko Ruisandro Cijntje a yega Dubai dia 26 di mart 2022.

 

E meta kardinal di e biahe aki ta haña un bista riba posibilidatnan pa atrae invershon for di Emiratonan Arabe. E kultura na e áreanan aki ta di tal indole ku mas haltu bo representashon ta, mas haltu den e hierarkia di e Emiratonan bo ta keda risibí. 

Esaki ta motibu pa kual Promé Minister Gilmar Pisas tambe mester tabata presente den e delegashon i tambe fungí komo e hefe di e delegashon.

A krea un delegashon ku ta konsistí di diferente kompanianan ku por bin hasi negoshi i alabes krea oportunidat pa trese invershonistanan pa Kòrsou.

Tin diferente otro pais (masomenos 200 pais) ku tambe ta na e Expo 2020 Dubai aki ku e mesun metanan.

 

Expo 2020 Dubai ta e Ekspo di mas grandi na mundu kaminda paisnan ta presentá nan mihó kara i ofertanan. E temanan di e Expo ta Energia, Awa i Kuminda ilustrando inovashonan i tambe vishon pa ku desaroyo duradero, seguridat alimentisio i solushonan pa konservá nos medio ambiente i naturalesa. 

 

Na yegada e delegashon a keda risibí dor di Embahador di Reino Hulandes na Emiratonan Arabé Uní sr. Lody Embrechts i miembronan di protokòl di Dubai.

Manera e delegashon a yega a sigui mesora ku un reunion ku e miembronan di e delegashon pa asina pasa dor e programa i mishon di e biahe.

 

Despues a sigui un reunion di sera konosí ku e Embahador di Reino Hulandes na Emiratonan Arabé Uní sr. Lody Embrechts. E Embahador tabata akompañá pa  e “Chef de Post” suplente, sr. Douwe Buzeman.  Durante di e reunion aki Promé Minister a risibí hopi informashon balioso i importante pa ku e historia, kustumber, vishon, “do’s and dont’s “i tambe di ki forma Kòrsou por benefisiá i posishoná su mes den un merkado nobo.

 

E delegashon a hasi un bishita despues na e Expo 2020 Dubai. Akinan tabatin oportunidat pa bishitá algun Paviljoen manera esun di Hulanda, Repúblika di Sürnam i Reino di Arabia Soudita. Di parti di kada un di e paisnan a risibí splikashon pa ku kon nan a duna kontenido na e temanan di e Expo.

 

Mas anochi e ministernan, huntu ku Embahador Embrechts, a risibí invitashon pa partisipá na e “High-level Sheik Horse Race Dubai World Cup 2022”.

Meta di e invitashon aki tabata pa e ministernan por a haña oportunidat pa krea netwerk i tambe sera konosí ku lidernan di un nivel mas haltu na Dubai pa por konkretisá e metanan di invershon ku Kòrsou ta deseá.

Promé Minister Gilmar Pisas a logra di papia ku entre otro sr. Adel Ahmad Al Redha, kende ta “Chief Operating Officer” di “Amirates Airline”. 

https://www.emirates.com/media-centre/emirates-welcomes-prime-minister-of-curacao-to-its-dubai-world-cup-hospitality-suite/

 

Tur potrèt di e aktividatnan ta athunto.

E promé dia di trabou tabata unu ku hopi sita i ku a kana di un forma hopi positivo.

Lo saka un komunikado na final di tur dia pa asina nos komunidat por keda bon informá.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: