Prome Minister Evelyn Wever-Croes: PROME MINISTER TA EXPRESA PALABRANAN DI CONSUELO Y FORSA NA FAMIA DI BABY NOAH Y HOBENCITA CASSIDY

 

 

Prome Minister Evelyn Wever-Croes:

PROME MINISTER TA EXPRESA PALABRANAN DI CONSUELO Y FORSA NA FAMIA DI BABY NOAH Y HOBENCITA CASSIDY

 

Aruba a cera un siman cu dos acontecimento hopi tristo cu a sacudi curason di tur. Prome Minister Evelyn Wever-Croes, den conferencia di prensa di Gobierno di Aruba dialuna mainta a expresa su palabranan di consuelo y forsa na ambos famia cu e perde nan yiu den un forma asina inespera.

 

Forsa na mayornan di Baby Noah:

Prome Minister den nomber di Gobierno di Aruba y pueblo di Aruba en general, ta desea mayornan y famia complete di baby Noah di apenas 4 luna, cu diahuebs a fayece na un scol creche, hopi forsa. Por a nota cu Aruba henter a biba e tristesa grandi aki hunto cu famia di baby Noah. E compromiso di Gobierno ta keda pa creche y luganan cu ta cuida nos muchanan ta luganan mas safe posibel pa nos muchanan. “Pero tin biaha, Dios ta dicidi diferente”, Prome Minister a expresa.

 

Accidente tragico di Cassidy:

E accidente tragico di boto unda cu un hobencita turista di 13 aña a perde su bida, tambe a conmovi comunidad bastante y tambe a trece hopi tristesa. Ministerio Publico y Polis Maritimo ta atendiendo cu investigacion profundo di e accidente aki y lo duna mas informacion despues cu esakinan bira disponibel. Prome Minister a duna di conoce cu despues cu e investigacion finalisa, lo reuni cu tur autoridad cu ta atende cu e tema di watersports pa delibera si e investigacion ta sugeri cu mester bin cambionan teniendo cuenta di e seriedad di e siguridad di local y turistanan.

 

Apelacion pa ta mas cauteloso:

Prome Minister ta haci apelacion riba tur cu ta haci e tipo di trabounan aki, pa ta extra cauteloso. Despues di e accidente tragico aki, e no por ta ‘business as usual mas’. “Esaki ta un muestra di e responsabilidad cu cada ciudadano ta carga pa nos hiba nos pais padilanti. Como gobernantenan, nos tin un responsabilidad grandi, pero cada ciudadano cu ta labora riba nos pais, esnan cu ta traha na beach, den hotel, den gobierno, scol y cualkier otro caminda, tin cu carga nos responsabilidad y sea extra cauteloso. Ban duna e miho calidad di servicio. Y ora cu ta trata bida di hende, laga nos pone mas atencion ainda na esaki”, Prome Minsiter a enfatisa.

 

Prome Minister ta bishita mayornan di Cassidy:

Prome cu nan a biaha bek pa nan pais, Prome Minister a bishita e mayornan di e hobencita Cassidy, kendenan ta hopi kibra y desconsola cu e perdida grandi aki di nan yiu. Sinembargo, nan ta hopi agradeci di e sosten cu nan a ricibi di varios persona na Aruba.

 

“Ban sigui tene mayornan di baby Noah como mayornan di Cassidy den oracion y den pensamento y cu Dios duna nan forsa cu e perdida grandi aki.