Prome Minister Evelyn Wever-Croes: BESTUURSKANTOOR A ‘LIGHT IT UP BLUE’ EN CONEXION CU DIA MUNDIAL DI AUTISMO “Gabinete Wever-Croes ta comprometi na crea un bon fundeshi pa inclusion”
Prome Minister Evelyn Wever-Croes:
BESTUURSKANTOOR A ‘LIGHT IT UP BLUE’ EN CONEXION CU DIA MUNDIAL DI AUTISMO
“Gabinete Wever-Croes ta comprometi na crea un bon fundeshi pa inclusion”
2 di april, ta Dia Mundial di Conscientisacion di Autismo. Anualmente riba e dia importante aki, varios organisacion rond mundo ta cende luznan blauw na nan edificionan, ciudadanonan ta bisti na blauw y eventonan special ta wordo organisa pa hunto crea conscientisacion y duna atencion na Autismo.
Gobierno di Aruba y Fundacion Autismo Aruba (FAA) diasabra anochi un biaha mas y pa varios aña ta uni na e causa special aki y ta ilumina bestuurskantoor cu luznan blauw. Despues di un ceremonia cortico na unda cu Prome Minister Evelyn Wever-Croes y Presidente di FAA señora Carolina Thiel-Span a duna un discurso cortico sigui pa presentacionnan di dos hoben cu autismo. Kay Quandus a trece un bunita poesia y Byron Lesire a introduci su mes y su retonan como un mucha cu autism, ambos hobennan talentoso cu autismo.
Despues di e ceremonia, Prome Minister, Ministernan Rocco Tjon y Endy Croes, miembronan di FAA y muchanan a ilumina Bestuurskantoor cu luznan blauw. Hunto nan a “Light it up blue.”
Den su discurso Prome Minister a enfatisa cu pa Gabinete Wever-Croes, e compromiso ta bay mas leu cu cende luznan blauw na Bestuurskantoor. Nacionnan Uni den nan reunion anual pa e dia di Autismo lo adresa e topico di enseñansa inclusivo y di calidad pa un y tur den e contexto cu esaki ta describi den e Sustainable Development Goal 4 – esaki ta e meta di desaroyo sostenibel di Nacionnan Uni cu ta enfoca riba enseñansa.
Gobierno di Aruba ta trahando den ekipo cu expertonan den diferente ramo pa percura pa Aruba tambe yega na realisacion di e ideal di e SDGs. Enseñansa ta un di e puntonan cu semper ta halto riba nos agenda. Hunto cu partnernan den enseñansa Gobierno ta trahando duro pa provee enseñansa di calidad y haci esaki inclusivo y accesibel pa un y tur. Esaki no ta un proceso facil.
Prome Minister: “Mundialmente e pandemia di Covid a trece retonan grandi cu ne, den e area di finansas pero den enseñansa tambe. Nos tur ta corda cu scolnan mester a wordo cera – rond mundo – y aki na Aruba tambe y esaki tabatin un impacto fuerte riba tur studiante y educadornan. Mas ainda riba e studiante cu tin mester di atencion special.
Banda di nos compromiso cu e SDGs y e desaroyo continuo di nos pais y enseñansa, tambe nos ta comprometi na crea un bon fundeshi pa inclusion. Nos di Gobierno ta sostene e proyecto di intervencion trempan pa muchanan cu entre otro Autismo. E proyecto aki ta percura pa muchanan di un edad jong ta ser evalua pa nan desaroyo y asina haya e apoyo den e areanan necesario pa por tin un desaroyo positivo.
E veld di enseñansa riba su mes ta uno cu constantemente ta den desaroyo. Cada bes tecnologia y estudionan cientifico ta siña nos mas y mas. Constantemente nos ta tumando pasonan pa no solamente eleva e calidad y nivel di educacion riba nos isla pero hunto cu organisacionnan manera Fundacion Autismo y Nacionnan Uni, nos ta percura pa haci esaki uno accesibel y inclusivo, specialmente pa esnan den e spectrum di autismo.
Awe mi kier a felicita Fundacion Autismo, e team di e proyecto di Intervencion Trempan, tur mayor, educador, coleganan y tur cu ta encarga cu cuido y desaroyo di un persona Autista, danki pa boso esfuerso y dedicacion. Mi admiracion y respet pa boso ta grandi. Danki pa boso trabou y danki pa ta un partner di Gobierno pa hunto nos percura pa haci Aruba un isla mas inclusivo”.
