Site icon

Advertisements
MINISTERIO KONSERNÍ HUSTISIA

 

MINISTER DI HUSTISIA KU INVENTARISASHON RIBA PUNTONAN DI PREOKUPASHON DEN E KADENA HUDISIAL

PUBLIKÁ RIBA 05 APREL 2022

WILLEMSTAD – Pa por yega na un maneho mas dirigí i alabes yega na solushon di e problemanan na un manera struktural, Minister di Hustisia mr. Shalten Hato ta inventarisá tur e puntonan di atenshon den e kadena hudisial.

Promé ku asumí e enkargo komo Minister di Hustisia, Minister Hato ya tabata na altura di algun di e puntonan di preokupashon den e kadena hudisial. Esei mes tabata e motibu pa kual Minister Hato dia 29 di mart último a reuní ku e tim di maneho di Kuerpo Polisial. Durante di e enkuentro Minister Hato a sera konosí ku e tim di maneho di un manera ofisial pa seguidamente el a haña un presentashon di entre otro struktura di e organisashon. Tambe a papia di e falta di personal, e retonan finansiero den e organisashon, e kantidat remarkabel di oranan di “overtime” i tambe e falta di material.

Despues di a tuma nota di e diferente preokupashonnan ku ta biba serka e tim di maneho di KPC, minister Hato a proponé pa djabièrnè dia 1 di aprel bolbe reuní i tambe minister a pidi e tim di maneho pa organisá un seshon durante kual minister por a papia ku empleadonan di e diferente departamentunan. Durante e enkuentro e minister a risibí e sifranan di kasonan di atrako, kasonan di ladronisia, kasonan di asesinato, morto den tráfiko i tambe minister Hato a haña un splikashon riba e impakto ku COVID-19 tabatin riba sifranan di kriminalidat.

Durante di su bishita, minister Hato a papia ku algun empleado di diferente departamentu. Mirando e nesesidat ku tin pa por amplia mas riba e puntonan di atenshon, minister Hato a proponé pa fin di luna di aprel, kontinuá ku e buelta di konsulta di manera ku e por haña un bista mas amplio i kompleto riba totalidat dje puntonan ku meresé atenshon den e kadena hudisial. E empleadonan a ekspresá nan gratitut na minister Hato p’e echo ku el a organisá e seshon pa a tende nan i nan a indiká ku nan ta hopi agradesido pa i sorpresá ku e atenshon ku el a duna.

Finalmente minister Hato a haña un rekorido den diferente departamentu, entre nan e departamentu di “Gezamenlijke meldkamer” kaminda tur yamada pa asistensia ta drenta. Aktualmente tur yamada pa asistensia di polis i tambe ambulans ta drenta na e mesun kaminda i ta e intenshon pa den futuro tur yamada pa asistensia di brantwer tambe drenta via e mesun sentra.

Minister di Hustisia Hato proksimamente lo bishitá e demas entidatnan ku ta kai den e kadena hudisial, pasó ta konhuntamente mester bai traha pa solushoná tur e puntonan di atenshon den e kadena hudisial, pa por garantisá un Kòrsou kaminda grandi i chikí por biba mas sigur.

Exit mobile version