Site icon

MINISTER DI HUSTISIA A SERA KONOSÍ KU KUERPO DI BRANTWER KÒRSOU

Advertisements
MINISTERIO KONSERNÍ HUSTISIA

 

MINISTER DI HUSTISIA A SERA KONOSÍ KU KUERPO DI BRANTWER KÒRSOU

PUBLIKÁ RIBA 06 APREL 2022

WILLEMSTAD – Djaluna, 28 di mart 2022, Minister di Hustisia nobo, sr. Shalten Hato huntu ku kolaboradornan di Gabinete, Sekretario General i Direktor di Sektor di Hustisia a realisá un bishita pa sera konosí ku Brantwer Kòrsou. Di parti di e kuerpo, nan a keda risibí pa e Komandante di Brantwer Kòrsou, ing. Elvin Regina i su staf di manehó. Durante di e reunion Minister di Hustisia huntu ku su delegadonan a risibí un presentashon di kon e kuerpo di Brantwer Kòrsou ta hinka den otro, funshonalidat i tareanan di kada departamento.

Durante di e reunion tambe maneho di Brantwer Kòrsou a tene un presentashon relashoná ku e trayekto nobo den e kuerpo titulá “Versteviging van de Brandweer Curaçao”, durante kual trayekto lo atendé e siguiente areanan di atenshon:

1) Organisashon i funshon
2) Areglo di posishon hurídiko
3) Sistema di formashon profeshonal
4) Lei i regla
5) Plan di komunikashon interno i eksterno.

Kuerpo di Brantwer Kòrsou a enfatisá riba e importansia pa kontinuá ku reunionnan struktural huntu ku e staf di manehó di Brantwer, pa asina por garantisá e trabou nan di fortifikashon den e kuerpo i salbarguardiá posishon hurídiko di kada personal ku ta resortá bou di kuerpo di Brantwer Kòrsou. Tambe a hasi entregá ofisial di plan pa e proyekto “Versteviging van de Brandweer Curaçao”, na minister di Hustisia.

Despues di reunion, Minister Hato a risibí un rekorido na pòst di Brantwer Rio Canario, Mundu Nobo, tambe na e Kantor prinsipal di Brantwer Kòrsou. Riba petishon di minister Hato, el a kombersá tambe ku personal di warda i skucha nan inkietut komo ámtenar i kon nan ta mira desaroyo di e kuerpo.

Na final di e enkuentro a palabrá ku ta bai kontinuá ku tratamentu di e puntonan di atenshon pa Brantwer Kòrsou riba un base struktural.

Exit mobile version